Presidenti amerikan Donald Trump ka shfuqizuar zyrtarisht sanksionet e ShBA-së ndaj Sirisë, me shpresën për ta riintegruar këtë vend të shkatërruar nga lufta në ekonominë globale, ndërkohë që Izraeli shpreh interes për lidhje me Damaskun.

Në një urdhër ekzekutiv të nënshkruar të hënën, Trump i dha fund një “gjendjeje të jashtëzakonshme kombëtare” në fuqi që nga viti 2004, e cila kishte vendosur sanksione të gjera ndaj Sirisë, duke prekur shumicën e institucioneve shtetërore, përfshirë edhe bankën qendrore.

“Shtetet e Bashkuara janë të përkushtuara për të mbështetur një Siri që është e qëndrueshme, e bashkuar dhe në paqe me veten dhe fqinjët e saj”, ka thënë Trump në urdhrin e postuar nga llogaria zyrtare e Përgjigjes së Shpejtë e Shtëpisë së Bardhë e Presidentit Trump 47 (Rapid Response 47) në X.

“Një Siri e bashkuar që nuk ofron një strehë të sigurt për organizatat terroriste dhe garanton sigurinë e pakicave të saj fetare dhe etnike do të mbështesë sigurinë dhe prosperitetin rajonal”, ka shtuar ai.

Më herët gjatë ditës, Sekretarja e Shtypit e Shtëpisë së Bardhë, Karoline Leavitt, u tha gazetarëve se ky veprim synon të mbështesë “rrugën e Sirisë drejt stabilitetit dhe paqes”.

“Urdhri do të heqë sanksionet ndaj Sirisë, duke ruajtur sanksionet ndaj ish-presidentit Asad, bashkëpunëtorëve të tij, abuzuesve të të drejtave të njeriut, trafikantëve të drogës, personave të lidhur me aktivitetet e armëve kimike, DEASh-it dhe bashkëpunëtorëve të tyre, dhe përfaqësuesve iranianë”, shtoi ajo.

“Ky është përsëri një veprim që presidenti premtoi dhe tronditi botën me të në Arabinë Saudite, sepse ai është i përkushtuar për të mbështetur një Siri që është e qëndrueshme, e bashkuar dhe në paqe me veten dhe fqinjët e saj”, tha ajo.

Muajin e kaluar, Trump njoftoi në një forum investimesh në Riad se do të hiqte sanksionet “brutale dhe paralizuese” ndaj Sirisë. Një ditë më vonë, ai zhvilloi një takim historik me presidentin sirian Ahmed al-Sharaa në Arabinë Saudite, takimi i parë midis udhëheqësish amerikanë dhe sirianë në 25 vjet.

Bashar al-Asad, i cili sundoi Sirinë për gati një çerek shekulli, iku në Rusi më 8 dhjetor 2024, duke shënuar fundin e sundimit dhjetëvjeçar të Partisë Baath, i cili filloi në vitin 1963. Al-Sharaa, i cili udhëhoqi forcat anti regjimit që rrëzuan Asadin, u shpall president për një periudhë kalimtare në fund të janarit.