Rusia njoftoi të hënën se po vendos kufizime ndaj 15 mediave evropiane si kundërpërgjigje ndaj masave të ndërmarra nga BE-ja kundër mediave ruse më herët këtë vit.

“Pala ruse ka vendosur të vendosë kundërkufizime për qasjen nga territori i Federatës Ruse në burimet në internet të pesëmbëdhjetë mediave të vendeve anëtare të bllokut, të përfshira në përhapjen e informacionit të rremë”, thuhet në një deklaratë të Ministrisë së Jashtme ruse.

Në deklaratë thuhet se masat janë ndërmarrë si reagim ndaj kufizimeve të vendosura nga blloku prej 27 anëtarësh në kuadër të paketës së 16-të të sanksioneve të miratuar në shkurt kundër tetë mediave ruse.

Deklarata shton se Brukseli dhe vendet anëtare të BE-së ishin paralajmëruar në mënyrë të përsëritur se ndalimet dhe “kufizimet e pajustifikuara” ndaj mediave ruse do të hasnin në një përgjigje nga Moska.

“Përgjegjësia për zhvillime të tilla bie tërësisht mbi Bashkimin Evropian dhe vendet anëtare të bllokut që mbështetën vendimet e paligjshme”, thuhet në deklaratë.

Po ashtu, thuhet se pala ruse do të rishqyrtojë vendimin e saj të fundit ndaj mediave evropiane “nëse do të hiqen kufizimet ndaj botimeve dhe kanaleve të informacionit vendas.”

Nuk janë dhënë detaje lidhur me mediat evropiane që janë sanksionuar nga Moska.

Më 24 shkurt, BE-ja njoftoi paketën e saj të 16-të të sanksioneve ndaj Rusisë, që përfshinte pezullimin e licencave të transmetimit të tetë mediave ruse: Eurasia Daily, Fondsk, Lenta, NewsFront, RuBaltic, SouthFront, Strategic Culture Foundation dhe Krasnaya Zvezda.