Türkiye Respublikasynyň Oba hojalyk we tokaýçylyk ministri Ibrahim Ýumakly, toparlaryň ýanan zolaklarda sowadyş işleirni dowam etdirýändigini belläp, soňky 24 sagatda ýüze çykan ähli 55 tokaý ýangynynyň ählisiniň gözegçilik astyna alynandygyny beýan etdi.

Ministr Ibrahim Ýumakly sişenbe güni žurnalistlere beren beýanatynda, soňky işjeň ýangynyň Bursa welaýatynyň demirgazyk-günbataryndaky Harmanjyk etrabynda bolandygyny belläp: “Jemi 5 uçar, 30 dikuçar we 855 gury ýer ulagy bilen ýangyny dolulygyna gözegçilik astyna almak üçin göreş alyp barýarys” diýdi.

Ibrahim Ýumakly irdenki dumanyň we tüssäniň, günortandan soňky güýçli şemalyň bolsa howa ulaglarynyň göreşini yza süýşürýändigini aýdyp: "Bu ýagdaý, ýangyny gözegçilik astyna almak üçin wagtymyzy hem uzaltdy. Şeýle-de bolsa, howa gowulaşyp başlansoň, howadan göreşimizi güýçlendirdik. Gury ýerden bolsa şonsuz hem gije-gündiz ýadawsyz iş alyp barýarys" diýdi.

Ibrahim Ýumakly, Bursadaky işleriň gowudygyny, sebit bilen bagly gowy habarlaryň günüň dowamynda paýlaşmagy umyt edýändiklerini mälim etdi.

Ministr Ibrahim Ýumakly tokaý ýangynlarynyň töwekgelçiliginiň ýokarydygyny duýduryp, halky ünsli bolmaga we hatda iň kiçi ýangyny hem habar bermäge çagyrdy.

Ýumakly: “Howp henizem geçmedi. Biz azyndan oktýabr aýyna çenli hüşgär bolarys” diýip belledi.