Makamanda kadhaa waandamizi wa kijeshi wa Iran na wanasayansi wa nyuklia waliuawa katika mashambulizi makubwa ya anga ya Israel yaliyolenga Tehran na miji mingine kote nchini mapema Ijumaa, kulingana na vyombo vya habari vya serikali ya Irani.
Miongoni mwa waliouawa ni Meja Jenerali Mohammad Bagheri, Mkuu wa Majeshi ya Iran, Jenerali Hossein Salami, Mkuu wa Kikosi cha Walinzi wa Mapinduzi (IRGC) na kamanda mkuu wa IRGC Jenerali Gholam Ali Rashid, mkuu wa makao makuu ya jeshi la Iran.
Mashambulizi hayo ya Israel pia yaligharimu maisha ya wanasayansi mashuhuri wa nyuklia wa Iran, akiwemo Fereydoon Abbasi, Ahmadreza Zolfaqari, Mohammad Mehdi Tehranchi, na Abdolhamid Minoucher.
Abbasi, mbunge wa zamani, alinusurika jaribio la mauaji mnamo 2010.
Mashambulizi ya Israel yalianza mwendo wa saa tisa alfajiri kwa saa za huko (2330 GMT) na kulenga vituo vya kijeshi na nyuklia, pamoja na maeneo ya makazi, kulingana na ripoti kutoka vyombo vya habari vya Iran.
Miongoni mwa maeneo yaliyoshambuliwa Tehran ni vitongoji vya juu vya kaskazini kama vile Qeytariyeh, Niavaran, Nobonyad, Mahallati, Kamraniyeh, Saadatabad, na Andarzgoo.
Maeneo mengine yaliyoathiriwa ni pamoja na Mehrabad, Narmak, Sattarkhan, Farahzadi, na wilaya za ziada katika mji mkuu.
Nje ya Tehran, kituo cha nyuklia cha Natanz katika mkoa wa kati wa Isfahan wa Iran pia kililengwa.
Video zinazosambaa mtandaoni zilionyesha miale ya moto na moshi ukipanda karibu na kituo hicho, huku Shirika la Kimataifa la Nishati ya Atomiki pia limethibitisha kuwa "tovuti ya Natanz (ilikuwa) miongoni mwa shabaha."
Jengo la kijeshi la Parchin, lililoko takriban kilomita 30 (maili 19) kusini mashariki mwa Tehran, pia liliripotiwa kushambuliwa, pamoja na kambi nyingine kadhaa za kijeshi katika mji mkuu.
Milipuko pia iliripotiwa katika miji mingine kadhaa, ikijumuisha Qom, Khorramabad, Hamedan, Tabriz, Piranshahr, Azabajani Magharibi, Kermanshah, Ilam, na Arak, kulingana na vyanzo vya ndani.
Iran yaapa "adhabu kali"
Katika kujibu mashambulizi hayo Kiongozi Mkuu wa Iran Ayatollah Ali Khamenei alitoa taarifa yenye maneno makali, akilaani uchokozi huo na kuapa kulipiza kisasi vikali.
"Utawala wa Kizayuni umefanya jinai katika nchi yetu pendwa leo alfajiri na mikono yake ya kishetani, iliyotapakaa damu. Umefichua tabia yake mbaya hata zaidi ya hapo awali kwa kulenga maeneo ya makazi," alisema.
"Utawala huo [wa Kizayuni] unapaswa kutarajia adhabu kali. Kwa Rehema za Mwenyezi Mungu, mkono wenye nguvu wa Jeshi la Jamhuri ya Kiislamu hautawaacha bila kuadhibiwa."
Taarifa hiyo imethibitisha kuwa makamanda na wanasayansi kadhaa wa jeshi la Iran wameuawa katika mashambulizi hayo, huku ikisisitiza kwamba warithi wao wataendelea na misheni yao mara moja.
