Na Miranda Cleland
Miezi tisa ya mauaji ya halaiki huko Gaza, na tukihesabu, kuna maelfu ya watoto wa Kipalestina waliokatwa angalau kiungo kimoja, ambao hawapati huduma ya matibabu wanayohitaji.
Dk. Ghassan Abu Sittah, daktari wa upasuaji wa plastiki kutoka Uingereza-Palestina ambaye aliwapasua Wapalestina wengi waliojeruhiwa huko Gaza, anakadiria sasa kunaweza kuwa na watoto 5,000 waliokatwa viungo vyao.
Kulingana na UNICEF, idadi hiyo iimeongezeka kwa kasi kutoka mwishoni mwa mwaka jana, ambapo karibu watoto 1,000 wa Kipalestina huko Gaza walilazimishwa kukatwa mguu mmoja au yote mawili.
Zaidi ya miezi saba imepita tangu makadirio hayo ya kwanza kutolewa, huku kampeni ya Israeli ya mauaji ya halaiki haionyeshi dalili za kupungua.
"Hili ndilo kundi kubwa zaidi la watoto waliokatwa viungo vyao katika historia," Abu Sittah alisema mwezi Machi.
Na huku vikosi vya Israeli vikiendelea kushambulia Wapalestina huko Gaza kupitia anga, nchi kavu na baharini, na mamlaka za Israeli zikiendelea kuzuia vikali misaada na vitu vingine muhimu kuingia Gaza, hakuna mfumo wa huduma ya afya uliobaki kutoa huduma ya matibabu kwa watoto hawa.
Ghazal mwenye umri wa miaka minne na familia yake walipigwa na bomu la Israeli lilofyatuliwa na kifaru, walipokuwa wakijaribu kukimbilia kusini mwa Gaza mnamo Novemba 2023.
"Shambulizi la kifaru lilimfanya binti yangu apoteze mguu," mamake Ghazal alimweleza mtafiti katika shirika la Defence for Children International - Palestine (DCIP), ambapo ninafanya kazi kama afisa wa utetezi mjini Washington, DC.
"Madaktari walilazimika kuupasua mguu wake bila kutumia sindano ya ganzi. Kulikuwa na visu kwenye ghorofa, walivileta na kupasha makali kutumia mtungi wa gesi, na wakaanza kukatwa mguu. Huku binti yangu alikuwa akipiga kelele."
Maumivu yasiyoingia akilini
Ghazal hayuko peke yake katika maumivu haya. Ukataji wa viungo vingi huko Gaza hufanywa kwa muda wa saa nyingi bila sindano ya ganzi, kiwango cha maumivu kisichofikiriwa na kisichovumilika haswa kwa mtoto.
Madaktari na wahudumu wa afya wanakata miguu na mikono ya watoto katika hospitali zenye msongamano mkubwa, ambapo makumi ya maelfu ya Wapalestina waliokimbia makazi yao wanatafuta makazi, na katika vyumba vya upasuaji vyenye giza bila umeme, dawa za kutuliza maumivu, viuavijasumu, au vifaa vya kufunga uzazi, wakati wote wakizingirwa na majeshi ya Israeli.
Kampeni ya mauaji ya kimbari ya Israeli imeathiri mfumo wa afya wa Gaza pakubwa sana. Hakuna huduma ya ufuatiliaji au tiba ya kimwili. Na hakuna kiungo bandia.
Mtoto aliyekatwa mguu anahitaji kiungo bandia mpya angalau mara moja kwa mwaka, na wakati mwingine hata mara nyingi zaidi, kulingana na ukuaji wao.
Mtoto anapokua, anahitaji utunzaji wa mara kwa mara kutoka kwa wataalamu. Watoto waliokatwa viungo kutoka Gaza wanaweza kukumbana na matatizo ya ajabu kadiri kukatwa kwao kunapoponywa, ikiwa ni pamoja na maambukizo, majeraha ya mashambulizi ya mabomu, na kuendelea kwa maumivu.
Ritaj mwenye umri wa miaka minane, msichana mdogo wa Kipalestina kutoka Juhr Al-Deek, kusini mwa Mji wa Gaza, alinusurika katika shambulio la anga la Israeli lililoua familia yake.
Baada ya siku mbili chini ya vifusi, Ritaj aliokolewa. Madaktari walilazimika kukata mguu wake baada ya kufanyiwa upasuaji mara kadhaa, na sasa anatatizika kupona huku akiwa hana makazi ya daima akiwa katika shule ya UNRWA.
"Daktari aliangalia mguu wangu, na minyoo ikatoka!" Ritaj alimwambia mtafiti wa eneo la DCIP ambaye alimtembelea katika makazi ya shule ya UNRWA anayoishi na shangazi yake. "Kila siku, siwezi kulala kwa sababu ya mlio wa bomu na nataka kulala kwa sababu nina maumivu ya mguu wangu, lakini navumilia."
Wakati baadhi ya watoto wa Kipalestina waliojeruhiwa huko Gaza wamenusurika kupoteza viungo vyao, wengine wanakabiliwa na kupooza kwa viungo katika maisha yao yote na matatizo yanayoambatana nayo.
Simulizi ya Muhammad
Vita hivyo vinawajeruhi watoto wa Gaza kwa njia nyinginezo.
Ndege ya Quadcopter ya Israeli ilifyatua risasi iliyompiga Mohammad mwenye umri wa miaka 15 alipokuwa akitembea kwenye Mtaa wa Salahaddin katika Jiji la Gaza katikati ya mwezi Machi, kulingana na nyaraka zilizokusanywa na DCIP.
Mohammad alivuja damu kwa masaa mawili kabla ya wapita njia wa Kipalestina kuweza kumpeleka katika Hospitali ya Al-Ahli Baptist.
Muda mfupi baadaye, alihamishiwa katika Hospitali ya Kamal Adwan, ambako alifanyiwa upasuaji. Sasa, Mohammad amepooza kuanzia kiunoni kwenda chini, hawezi kutumia miguu yake.
"Nilikuwa napenda kucheza na marafiki zangu, ambao niliwapoteza baadhi yao wakati wa vita, lakini sasa siwezi kucheza kutokana na majeraha," Mohammad aliiambia DCIP.
"Nilikuwa napenda kucheza soka, na siku zote nilisimama kama kipa."
Kabla ya Oktoba, mtoto wa Kipalestina mwenye umri wa miaka 16 huko Gaza alikuwa amepitia mashambulizi matano makubwa ya kijeshi ya Israeli ambayo yaliua na kujeruhi mamia ya wenzao.
Kimsingi kila mtoto katika Gaza leo amepatwa na kiwewe, ambacho kinaweza kudhihirika kama wasiwasi, mfadhaiko, mawazo ya kujiua, kukojoa kitandani, kukosa usingizi, hofu ya usiku, na zaidi.
Takriban asilimia 12 ya watoto wa Kipalestina huko Gaza walikabiliwa na angalau "shida moja ya kimwili au kiakili" kabla ya vita vya hivi punde dhidi ya Gaza kuanza, kulingana na UNICEF.
Ikiwa ulemavu wa mtoto ni wa kimwili au kiakili, wako katika hatari kubwa, wakati wa mashambulizi ya Israeli. Watoto wanaotegemea viti vya magurudumu au vifaa vingine vya usaidizi hawawezi kusonga kwa urahisi kwenye barabara zilizoharibiwa.
Walioko hatarini
Dunia, msichana mwenye umri wa miaka 12 alinusurika kwenye shambulizi la Israeli 'lililoua wazazi wake na ndugu zake na kumkata yeye mguu.
"Kulikuwa na damu na sikuwa na mguu," Dunia alimwambia mtafiti wa eneo la DCIP mnamo Novemba. "Nilijaribu kuisogeza, lakini haikusonga."
Mashambulizi ya Waisraeli yalimkosesha Dunia familia yake, na kumzika chini ya vifusi, yakamfanya yatima na kuharibu mguu wake.
Wakati Dunia alipokuwa akipata nafuu katika Hospitali ya Naser huko Khan Younis mnamo Desemba 2023, shambulizi la kifaru la Israeli lilimpiga alipokuwa amelala hospitalini mwake. Dunia aliuawa papo hapo.
Wanajeshi wa Israeli wanatekeleza ukatili kwa watoto wa Kipalestina huko Gaza kila kukicha. Wakati idadi ya vifo vya watoto huko Gaza inazidi 15,000, na watoto zaidi wakipata majeraha kutokana na mashambulizi ya Israeli, jumuiya ya kimataifa hadi sasa imechelewa kuchukua hatua.
Nchi lazima zisitishe utiririshaji wa silaha kwa jeshi la Israeli kwa sababu watoto huko Gaza wanahitaji usitishaji wa mapigano leo. Watoto wa Kipalestina walemavu wanastahili kuishi na kupona majeraha yao, fursa ambayo majeshi ya Israel yalimnyima Dunia.
Wajibu wa kisheria
Kwa watoto wa Kipalestina wenye ulemavu huko Gaza kama vile Ghazal, Ritaj, Mohammad, na maelfu ya watoto waliojeruhiwa ambao sasa wanazunguka ulimwengu na kiungo kimoja kidogo, kuhakikisha watoto hawa wanapata huduma ya matibabu, elimu, na urekebishaji sio tu jambo sahihi la kufanya. : Kishweria inapaswa iwe hivyo.
Israel ilisaini Mkataba wa Umoja wa Mataifa wa Haki za Mtoto mwaka 1991, ambapo imekubali kuzingatia haki maalum za watoto.
Kifungu cha 23 cha CRC kinazingatia haki maalum za watoto wenye ulemavu.
Wanapaswa kupokea huduma maalum na elimu ili kuwezesha ushirikiano wao kamili wa kijamii na maendeleo ya kibinafsi, pamoja na haki yao ya elimu, mafunzo, huduma za afya, ukarabati, na fursa za michezo na burudani.
Mauaji ya kimbari ya Israeli huko Gaza yanawalenga watoto walemavu wa Kipalestina ambao hawawezi kukimbia kutokana na mashambulizi ya anga, kusikia risasi zikifyatuliwa, au kuelewa ni kwa nini familia zao zimehamishwa mara kwa mara.
Baada ya miezi tisa ya mauaji ya kimbari, watoto wengi wa Kipalestina huko Gaza wana mahitaji magumu ya kimatibabu, na ni juu ya jumuiya ya kimataifa kuweka vikwazo vya silaha na kufanya kazi kuwawajibisha viongozi wa Israeli kwa uhalifu wao.
Miranda Cleland ni afisa wa utetezi katika shirika la Defence for Children International - Palestina na anaishi Washington, DC, ambako anatetea haki za binadamu za watoto wa Kipalestina. Ana shahada ya kwanza ya heshima kutoka Chuo Kikuu cha Marekani katika Masomo ya Kimataifa na Lugha ya Kiarabu.
