Baraza la Wawakilishi la nchini Ethiopia limeidhinisha tangazo muhimu linaloruhusu raia wa kigeni kumiliki mali isiyohamishika ya makazi nchini Ethiopia katika mabadiliko makubwa ya sera ya umiliki na uwekezaji.

Profesa Mohammed Abdo, mwenyekiti wa Kamati ya Kudumu, alisema tangazo hilo linalenga kuhamasisha uwekezaji wa kigeni katika sekta ya makazi ya Ethiopia bila kuathiri haki za umiliki wa ardhi wa ndani.

Alibainisha kuwa kiwango cha chini cha uwekezaji cha dola 150,000 kimewekwa kwa raia wa kigeni wanaotaka kumiliki mali ya makazi.

Muswada huo uliidhinishwa kwa mara ya kwanza na Baraza la Mawaziri mwezi Mei mwaka huu katika kile kilichoandaliwa kama sehemu ya juhudi pana za kuvutia uwekezaji kutoka nje, kushughulikia mahitaji ya makazi, na kuchochea upatikanaji wa ajira, bila kudhoofisha haki za raia wa Ethiopia kumiliki na kutumia mali na "kudhibiti umiliki na matumizi ya mali isiyohamishika kwa raia wa kigeni."

Muswada huo uliowasilishwa na Kamati ya Bunge ya Masuala ya Miji, Miundombinu na Uchukuzi, ulijadiliwa na kupitishwa tarehe 24 Juni.

Wakati sheria mpya inafungua milango ya umiliki wa nyumba kwa raia wa kigeni, inasisitiza kuhusu kifungu cha muda mrefu cha kikatiba cha Ethiopia kwamba "ardhi inasalia kuwa mali ya pamoja ya watu na serikali."

Kwa hivyo, raia wa kigeni wanaweza kumiliki makazi, lakini sio ardhi yenyewe, na wamezuiwa kuuza au kuhamisha umiliki.

Mwezi Machi 2025 Waziri Mkuu Abiy Ahmed alifichua wakati wa mkutano na walipa kodi wakubwa nia ya serikali kuruhusu wageni kumiliki mali isiyohamishika kama sehemu ya mageuzi mapana ya kiuchumi.

Wakati huo, Abiy pia alionyesha mipango ya kuikomboa sekta ya soko la rejareja ya Ethiopia, ambayo bado haiwezi kufikiwa na umiliki wa kigeni.

Baadhi ya wabunge walionyesha wasiwasi kwamba kiwango hicho kinaweza kuwa "chini sana," na huenda ikafungua uwezekano wa "utakayoshindwa kudhibitiwa" wa raia wa kigeni.