Jamhuri ya Kidemokrasia ya Congo, DRC imezindua awamu ya pili ya kampeni kubwa ya chanjo ya polio inayolenga zaidi ya watoto milioni 10.
"Polio inaendelea kusambaa na inaweza kusababisha kupooza. Kwa hiyo, tuna juhudi za pamoja. Kuchanja mtoto mwenye kinga nzuri pia kuwalinda watoto wengine," alisema Elisabeth Mukamba, Mratibu wa Kamati ya Operesheni ya Dharura ya Polio nchini humo.
Mnamo 2024, DRC ilithibitisha kuwepo kwa watu 25 wenye virusi vya polio vinavyozunguka (aina ya 1 na 2).
Shirika la Afya Duniani (WHO) lilisema katika taarifa yake kwamba licha ya juhudi za kukabiliana, maambukizi ya virusi vya polio aina ya 2 yanaendelea katika majimbo kadhaa, na kusababisha tishio kwa watu walio hatarini.
Kuanzia Juni 26 hadi 28, watoto wachanga hadi wenye umri wa miaka mitano watachanjwa katika majimbo ya Kinshasa, Tanganyika, Haut-Lomami, Congo ya Kati, na Haut-Katanga, pamoja na wale walio na umri wa hadi wa miaka 15 huko Tshopo na Maniema.
"Ili kukatiza maambukizi na kuwalinda watoto, kuna haja ya dharura ya kuongeza kinga ya watu kupitia kampeni za kawaida za chanjo na chanjo nyingi," WHO ilisema.
Ilisema dozi milioni 13 za chanjo hiyo zitatumika, huku timu 60,000 za watoa chanjo zitatoa chanjo hiyo.
Kampeni dhidi ya Polio Angola
Angola imezindua kampeni ya chanjo ya polio.
Kampeni hiyo inalenga kulinda zaidi ya watoto nusu milioni na kusaidia jamii kutokomeza ugonjwa huo. Takriban wahudumu wa afya 5,000, wakiwemo wataalamu wa afya na watu wa kujitolea wa jamii, wamehamasishwa kwa ajili ya kampeni ya sasa ya chanjo ya polio.
"Kampeni hii ni kitendo cha ulinzi, mshikamano, na matumaini kwa mustakabali wa Angola. Polio sio tu tishio lisiloonekana, lakini pia inaweza kusababisha uharibifu wa kudumu wa kimwili, kama vile kupooza, " wakati wa hafla ya uzinduzi, Dkt Fekadu Lemma, mratibu wa Global Polio Eradication Initiative (GPEI) nchini Angola, alisema.
Licha ya mafanikio makubwa tangu kukatizwa kwa virusi vya polio mwaka 2011 na Angola kuthibitishwa kuwa haina polio mwaka 2015, nchi hiyo sasa inakabiliwa tena na changamoto mpya.
Mlipuko huo umesababisha maambukizi 13 vya virusi vya polio vilivyothibitishwa katika manispaa za Benguela, Cubal, Dombe Grande na Bocoio.
Kwa kujibu, Wizara ya Afya, ikiungwa mkono na WHO na washirika wa GPEI, inaendesha kampeni kubwa ya chanjo ya nyumba kwa nyumba kutoka 27 hadi 29 Juni. Kampeni hiyo inalenga kuchanja zaidi ya watoto 554,000 walio chini ya umri wa miaka mitano.
