Konflikti në Sudan po tejkalon kufirin jugperëndimor të vendit dhe po përhapet në Republikën e Afrikës Qendrore, ka paralajmëruar shefi i paqeruajtjes në OKB.
Nënsekretari i Përgjithshëm Jean-Pierre Lacroix i tha Këshillit të Sigurimit të OKB-së se sulmi që vrau një paqeruajtës të OKB-së pranë kufirit të Afrikës qendrore me Sudanin të premten e kaluar u krye nga “elementë të armatosur sudanezë”.
Deklaratat e tij të enjten ishin të parat që identifikuan luftëtarë të armatosur sudanezë si përgjegjës për sulmin ndaj paqeruajtësve.
Sekretari i Përgjithshëm i OKB-së, Antonio Guterres, tha gjithashtu në një raport të ri drejtuar Këshillit të Sigurimit se automjete të dyshuara si pjesë e Forcave të Mbështetjes së Shpejtë (RSF) — aktorë kyç në luftën civile të Sudanit — janë parë disa herë në zonat Am Dafok dhe Aouk në prefekturën Vakaga të Republikën e Afrikës Qendrore, ku janë të pranishëm edhe paqeruajtës të OKB-së.
Në raportin që mbulon periudhën nga mesi i shkurtit deri në mesin e qershorit, Guterres theksoi: “Në verilindje (të RAQ), ndërhyrjet e armatosura të lidhura me konfliktin në Sudan kanë vazhduar.”
Luftë civile vdekjeprurëse
Sudani u zhyt në luftë civile kur gjeneralët rivalë që drejtojnë forcat e armatosura të vendit dhe paramilitarët e RSF-së nisën luftimet në mes të prillit 2023.
Që atëherë, të paktën 24,000 njerëz kanë humbur jetën, rreth 13 milionë sudanezë janë detyruar të braktisin shtëpitë, uria po përhapet dhe kolera ka shpërthyer në të gjithë vendin. Të dyja palët janë akuzuar për krime lufte.
Ndërkohë, Republika e Afrikës Qendrore është përfshirë në konflikt që nga viti 2013, kur rebelë kryesisht myslimanë morën pushtetin dhe përmbysën presidentin François Bozize. RAQ është një nga vendet e para në Afrikë që mirëpriti forca të mbështetura nga Rusia, me synim të ndihmojnë autoritetet për të mbrojtur institucionet dhe për të luftuar grupet e armatosura.
Lacroix tha se, ndonëse po bëhet përparim me disa grupe në drejtim të riintegrimit në procesin e paqes në RAQ, dhuna nga grupet dhe milicitë e armatosura vazhdon, duke minuar stabilitetin dhe duke përbërë kërcënim të madh për civilët.
“Mundësi kyç”
Ai theksoi se qeveria vazhdon të bashkëpunojë me MINUSCA — misionin e OKB-së për paqeruajtje në RAQ — për ta zgjeruar dhe përmirësuar praninë e saj në gjithë vendin dhe për të forcuar sigurinë në zonat kufitare.
“Pavarësisht këtyre përpjekjeve, situata e sigurisë mbetet e brishtë në zonat kufitare verilindore,” tha Lacroix. “Në rajonin kufitar me Sudanin, paqëndrueshmëria vazhdon të karakterizohet nga përhapja e konfliktit sudanez.”
Me zgjedhjet e përgjithshme të planifikuara për në dhjetor, situata politike mbetet “e tensionuar dhe e përshkuar nga mosbesimi midis shumicës në pushtet dhe opozitës,” shtoi ai.
Zgjedhjet, sipas Lacroix, përfaqësojnë një “mundësi kyçe” për të forcuar qeverisjen demokratike, për të nxitur pajtimin dhe për të konsoliduar stabilitetin.
