Klubi spanjoll i futbollit Real Madrid konfirmoi sot se Xabi Alonso do të jetë trajneri i tyre kryesor për tri sezonet e ardhshme. 

“Xabi Alonso e filloi karrierën e tij si trajner në akademinë e Real Madridit, duke marrë drejtimin e ekipit nën-12 vjeç për sezonin 2018-2019 dhe duke fituar ligën dhe ‘Torneo de Campeones’” tha klubi në një deklaratë.

“Ai tani kthehet në Real Madrid si një nga trajnerët më të mëdhenj në botë pasi bëri histori me Bayer Leverkusenin, ku fitoi ligën, kupën dhe Superkupën e Gjermanisë gjatë tri sezoneve”, shtoi ai.

Real Madridi tha se 43-vjeçari do të prezantohet të hënën si trajneri i ri kryesor në një aktivitet që do të mbahet në ambientet e klubit.