Zyra e të Drejtave të Njeriut në OKB ngriti alarmin të martën për raportimet se Izraeli po punon me vende të tjera, përfshirë ShBA-në, për të lehtësuar të ashtuquajturën zhvendosje vullnetare të palestinezëve nga Gaza, duke paralajmëruar se plane të tilla mund të përbëjnë transferim të detyruar sipas së drejtës ndërkombëtare.

“Kjo ngre shqetësime në lidhje me transferimin e detyruar,” tha zëdhënësja Ravina Shamdasani para gazetarëve në një konferencë për shtyp në OKB, në Gjenevë.

“Koncepti i zhvendosjes vullnetare në kontekstin që po shohim aktualisht në Gaza është shumë i diskutueshëm,” shtoi ajo.

OKB-ja ka paralajmëruar më parë kundër deklaratave – përfshirë edhe ato të presidentit amerikan Donald Trump, që sugjerojnë zhvendosjen e palestinezëve nga Gaza.

Që nga tetori i vitit 2023, ushtria izraelite ka vrarë mbi 57.500 palestinezë, shumica gra dhe fëmijë, në Gaza. Bombardimet e pandërprera kanë shkatërruar enklavën, duke shkaktuar mungesë të ushqimit dhe përhapje të sëmundjeve.