Дания ЕО-дағы алты айлық төрағалығын атап өту аясында Украина президенті Владимир Зеленскийді қабылдап, Украинаның ЕО-ға қосылуына қолдау білдіретінін мәлімдеді.

Дания премьер-министрі Метте Фредериксен бейсенбі күні:
«Украинаны күшейтуіміз, ал Ресейді әлсіретуіміз керек,» – деді. Фредериксен Киевке әскери қолдауды арттырып, Мәскеуге қарсы санкцияларды күшейтуге уәде берді.

Зеленский Данияның Орхус қаласында Еуропа комиссиясының төрайымы Урсула фон дер Ляйен және Еуропа кеңесінің төрағасы Антониу Коштамен кездесті.

Фредериксен Еуропаның қауіпсіздігін күшейтудің маңызын атап өтіп, бұл бағытты қатаң көші-қон саясатымен байланыстыратынын айтты. Дания ЕО төрағалығы кезінде Украина күн тәртібін толық қолдайтынын және қорғайтынын мәлімдеді.

Орхус қаласындағы бұл кездесу АҚШ президенті Дональд Трамптың Украинаға НАТО-ға кіруге бағытталған қадамдарын іс жүзінде бұғаттап, елге қару жеткізуді шектейтін шешімдерінен кейін өтті.

Ресейдің шабуылдары соғысты тоқтатуға бағытталған келіссөздерде ілгерілеу болмауы салдарынан күшеюде. Бұл жағдай 2022 жылдың ақпанында басталған соғыстан бері Батыстың әскери қолдауына арқа сүйеп келген Киевке ауыр соққы болды.

Дания премьер-министрі Метте Фредериксен: «Украина — Еуропаның қауіпсіздігі үшін өмірлік маңызы бар ел. Украинаға көрсетіп отырған көмегіміз өз бостандығымызды қорғау деген сөз» – деді.

Сондай-ақ ол: «Украина – Еуропалық Одақтың құрамында болуы тиіс ел. Бұл Данияның да, Еуропаның да мүддесіне сай келеді. Сондықтан Дания ЕО төрағасы ретінде Украинаның ЕО-ға мүше болу жолындағы үдерісін барынша қолдайды,» – деп мәлімдеді.

Данияның Еуропа істері жөніндегі министрі Мари Бьерре бейсенбі күні журналистерге берген мәлімдемесінде: «Украинаның ЕО-ға мүшелікке өтуі — біз үшін аса маңызды мәселе,» - деді.

«Біз әлі де Венгрияның қарсылығын еңсеруге тырысып жатырмыз,» - деген министр Венгрия Премьер-министрі Виктор Орбанның «Украинаның ЕО-ға қосылуы 27 мүшелі одақты құрдымға апарады» деген пікірін еске салды.

Венгрия вето құқығын пайдаланып, Украинаның мүшелікке қабылдану процесін тоқтатып отыр.

Украина тарапы болса, Будапешттің ұстанымынан бас тартуы мүмкін екеніне әлі де сенетінін айтып, «ашық жарияланбаған келіссөздер жүріп жатқанын» жеткізді.

Дания үкіметі Орхус қаласында өткен кездесуде Украинаға көрсетілетін әскери көмекті арттыру, елдің қорғаныс өнеркәсібімен ынтымақтастық орнату және Ресейге қарсы жаңа санкцияларды талқылайтынын мәлімдеді.

Сондай-ақ бұл Скандинавия елі Еуропа елдерін қорғанысқа көбірек қаржы бөлуге шақыруда.
Дания наурыз айында ұсынылған Еуропаның қорғаныс әлеуетін арттыруға бағытталған инвестициялық жоспарды қолдайтынын айтып, бұл бастаманың қарапайым рәсімдер мен жеңілдетілген несиелер арқылы жүзеге асырылатынын айтты.

Дания өз қорғаныс шығындарын да айтарлықтай арттырды. Қазіргі таңда бұл шығындар елдің ЖІӨ-нің 3%-дан астамын құрайды.