Түркияның Ұлттық Қорғаныс министрі Яшар Гүлер PКК лаңкестік ұйымын және түрлі аймақта түрлі атаумен әрекет ететін барлық тармақтарын таратуға және «қаруларын шартсыз тапсыруға» шақырды.
«Ұйымның терроризммен еш жерге жете алмайтынын, өмірінің біткенін және өзін-өзі таратудан басқа шарасы жоқтығын кеш болса да түсінгені көңіл аударарлық» деді министр Гүлер сенбі күнгі іс-шарада сөйлеген сөзінде.
«Бұл тұрғыда атысты тоқтату сияқты мәтінде қамтылмаған мәселелер күн тәртібіне шығарылмауы керек. Өйткені мұндай нәрсе ешқашан болмайды», - деп қосты ол.
Түркияның лаңкестікке қарсы күресі ұзақ жылдар бойы елдің басты күн тәртібінде екенін атап өткен Гүлер “Түрік Қарулы Күштері елдің бірлігі мен тұтастығына қауіп төндіретін кез келген қатерге «үлкен табандылықпен» қарсы тұрып, өзіне жүктелген міндеттерді сәтті орындап жатыр”, - деді.
Анкараның түпкі мақсаты – терроризмді тоқтатып, елге қауіп төндіретін кез келген қатерді жою екенін атап өтіп, «Процеске саботаж және қиянат жасауға немесе ұзартуға жол берілмейді. Сақтық пен ұтымды көзқарас негізге алынады», - деді министр.
PKK Түркияға қарсы 40 жыл бойы жүргізген террорлық науқанында әйелдер, балалар, сәбилер мен қарттар да бар 40 мыңнан астам адамның өліміне жауапты. PKK-ны Түркия, АҚШ және Еуропалық Одақ террор ұйымы деп таныған.
Қауіпсіздік мәселелерінде шегінуге жол жоқ
Президенттің сыртқы саясат және қауіпсіздік жөніндегі бас кеңесшісі Акиф Чагатай Кылыч теледидар бағдарламасында сөйлеген сөзінде Анкараның «Біз өз қауіпсіздігіміз бен Сирияның болашағына қатысты тезистерімізден бас тартқан жоқпыз» деп баса айтты.
Кылыч Түркияның PКК лаңкестік ұйымының Сириядағы тармағы болып табылатын YPG басқаратын SDF-ке қатысты соңғы келісімнің нәтижелерін мұқият қадағалайтынын айтты. Ол сондай-ақ бұл прогрестің оң дамуы үшін Анкараның қолдау көрсететінін мәлімдеді.
Сирияның Латакия аймағында биліктен шеттетілген режим элементтері мен жаңа үкімет күштері арасындағы соңғы оқиғаларға қатысты Кылыч мемлекет билігінің қалыптаса бастағаны, бірақ адам шығыны барша үшін қайғылы жағдай екенін айтты. Қауіпсіздік пен тұрақтылықты сақтау тұрғысынан мемлекеттік биліктің қалыптаса бастағаны, унитарлық құрылымды қорғауға және қауіпсіздікті қамтамасыз етуге ерік-жігердің болуы оң даму екенін атап өтті.
Кылыч ДАИШ-тің Сирияда бар екендігіне де тоқталып, “Түркия ретінде біз мұндай ұйымды қабылдамаймыз. Бұл ұйым террористік ұйым және жойылуы керек»,- деді.
