АҚШ Президенті Дональд Трамптың Қытай импортына енгізген жоғары кеден салықтарына жауап ретінде Қытай енгізген 84% көлеміндегі тариф бейсенбі күні күшіне енді. Бұл жағдай екі алып экономиканың арасындағы сауда текетіресінің шарықтау шегіне жеткен кезеңге тұспа-тұс келді.

Бұған дейін Қытай Трамптың алғашқы кезеңдегі тарифтеріне жауап ретінде 34% көлемінде қарсы баж жариялап, Трамп бұл шаралардан бас тартпаған жағдайда жауаптық шараларды күшейтетінін ескерткен болатын. Алайда Трамп бұл ескертуді елемей, Қытай импортына салынатын тарифтерді 104%-ға, кейін 125%-ға дейін көтерді.

Осыған жауап ретінде Қытай да АҚШ өнімдеріне 84% кеден салығын енгізіп, АҚШ-тың 18 компаниясын сауда шектеу тізіміне енгізді және бірқатар өзге де қарсы шараны жүзеге асырды.

Қазіргі жағдайға қарағанда екі ел арасындағы сауда соғысы жақын арада тоқтайтын түрі жоқ.

Туындаған тариф қысымын жеңілдету мақсатында Қытай өзге мемлекеттермен сауда келісімдерін нығайтуға күш салып жатқаны байқалады.

Пекин мен Брюссель арасындағы жақындасу

Қытай Халық Республикасының Төрағасы Си Цзиньпин алдағы аптада Малайзия секілді Оңтүстік-Шығыс Азия елдеріне сапар жасамақ.

Қытай мен Еуропалық Одақ Дүниежүзілік сауда ұйымын (ДСҰ) негіз еткен көпжақты сауда жүйесін бірлесіп қолдауға уәде берді. Бұл келісім Қытай Сауда министрі Ван Вэньтао мен Еуропа комиссиясының Сауда және Экономикалық қауіпсіздік жөніндегі комиссары Марош Шефчович арасында өткен виртуалды кездесу барысында жасалды.

Қытайдың мемлекеттік "Синьхуа" ақпарат агенттігінің бейсенбі күнгі хабарлауынша тараптар Қытай–ЕО арасындағы экономикалық және сауда ынтымақтастығын нығайту, сондай-ақ АҚШ енгізген «өзара тарифтеріне» жауап беру сияқты мәселелерді талқылады.

Марош Шефчович АҚШ-тың кедендік тарифтерінің халықаралық саудаға елеулі әсер еткенін және Еуроодақтың Қытайды қоса алғанда ДСҰ-ның басқа мүшелерімен бірге халықаралық сауданың қалыпты жұмыс істеуін қамтамасыз етуге дайын екенін мәлімдеді.