«Стамбул ертегі мектебі» жобасы аясында мұғалімдер ауруханада ем алып жатқан балаларға ертегі айтып, «Ерте, ерте, ертеде» деп басталатын әңгімелер арқылы жас пациенттердің өмірге деген құштарлығын қайта оятуда.

 Стамбул қалалық білім басқармасы жүзеге асырып жатқан бұл жоба ертегі  шеберханаларын құруды қамтиды. Жобаның маңызды бір бөлігі ұзақ мерзімді ем қабылдап жатқан балаларға арналған.

 «Ауруханада ертегі бар» ұранымен ертегі мектебінің мұғалімдері ауруханаларға барып, «Масалхана» (Ертегі үйі) сессияларын өткізеді, онда олар жас пациенттермен байланыс орнатады.

 Балалардың денсаулық жағдайына байланысты мұғалімдер ертегілерді аурухана сыныптарында немесе палатада төсек жанында айтып береді. Бұл әңгімелер балаларға болашаққа үмітпен қарауға көмектеседі.

 Анадолы агенттігі (AA) Башакшехир Чам және Сакура қалалық ауруханасында өткен «Масалхана» іс-шарасын түсірді. Онкология және физиотерапия бөлімдерінде ем алып жатқан балалардың ертегі сессияларына қатысқанын көрсетті.

 Стамбул қалалық білім басқармасының директоры Мұрат Мұхит Йентүр қалада шамамен 3 миллион оқушы мен 170 мың мұғалімнің білім беру іс-шараларына белсенді қатысатынын айтты.

 Ол Стамбулдың білім беру жүйесінде өнер, спорт мектептері, имам хатип мектептері және кәсіптік мектептер сияқты мамандандырылған салалар бар екенін атап өтті.

 Йентүр аурухана сыныптарын ерекше деп сипаттады. Оның айтуынша қаладағы 15 ауруханадағы 18 сыныпта 2 мыңнан астам бала білім алады.

 «Біз бұған үлкен мән береміз», – деді ол. «Баршаға, барлық жерде, әрдайым білім беру» және «Білім беруде шектеу жоқ» деген ұстанымдарды басшылыққа аламыз» деп қосты.

 Йентүр «Масалхана» сессияларына қатысқан балалар туралы: «Бұл балалар денсаулық мәселелеріне байланысты мектептерінен алыстап қалды. Осы жағдайдың теріс әсерін азайту үшін біз ауруханаларда сынып аштық. Біздің мақсатымыз – олардың мұғалімдерімен бірге білім алуды жалғастырып, танымдық және әлеуметтік-эмоционалдық дағдыларын сақтап қалуы», – деді.

 Ол сондай-ақ академиялық білімнен бөлек, аурухана сыныптары мен «Масалхана» іс-шаралары балалардың мотивациясын арттыратын, отбасылар қатыса алатын орта ұсынатынын атап өтті. «Масалхана» арқылы мұғалімдер балаларға қызықты визуалды және дыбыстық тәжірибе ұсынады. Біз балаларға қуаныш сыйлап, оларға қиындықты қысқа уақытқа болса да ұмыттырғымыз келеді. Біздің мақсатымыз – мұны Стамбулдағы барлық сыныптарға тарату. Әрбір ата-ананың өтінішін қарастырып, жауап береміз», – деді.

 Жобаның жалпы үйлестірушісі Хатидже Чакыр Ермиш Стамбул ертегі мектептерінің бес түрлі бағытта жұмыс істейтінін айтты.

 Ол бұл ертегілер арқылы балалардың мәдени дәстүрлер мен құндылықтармен қайта байланыс орнатып, мектепке оралуға дайындалатынын түсіндірді. «Кейде ата-аналар да сессияларға қатысады және олар ата-әжелерінен ертегі тыңдап өскендіктен, бұл оларға  да ұнайды. Көпшілігі ұзақ уақыт бойы ертегі тыңдамағанын айтады», – деді.

 Ермиш ауруханадағы ертегі іс-шаралары «Масалхана» сессиялары кезінде өткізілетінін атап өтті. 15 ауруханада жұмыс істейтін бес үйлестіруші ертегілер арқылы балаларға мотивациялық және эмоционалдық қолдау көрсетеді.

 «Кейбір балалар бөлмелерінен шыға алмайтындықтан, біз оларға арнайы барамыз. Бұл сапарлар оларды ерекше қуантады», – деді ол.

 Мұғалімдер әрі білімге, әрі емделуге қолдау көрсетеді

 Аурухана сыныптарында жұмыс істейтін әлеуметтік ғылымдар мұғалімі Айсун Алажа мектепке дейінгі жастан бастап жоғары сыныпқа дейінгі оқушыларға төсек жанында және сыныптарда сабақ беретінін айтты.

 Ол тек академиялық сабақтар ғана емес, сонымен қатар психоәлеуметтік қолдау көрсететіндерін атап өтті. «Біз олардың көңіл-күйі мен емделу процесіне оң әсер етуді мақсат етеміз. Мұның қайтарымы, жауабы бізді өте жігерлендіреді, кейбір балалар «Мұғалім, қашан қайта келесіз?» деп сұрайды», – деді.

 Балалар мен ата-аналар алғыс білдіреді

 Ем алып жатқан 12 жастағы Мираж Булут Курт «Масалхана» іс-шарасына қатысқанына қуанышын білдіріп, «Мұғалімдер мені қатты қуантты. Маған өте ұнады. Барлық балалар қиялын кеңейтіп, бір күні өз балаларымызға осындай іс-шаралар ұйымдастыра алсақ екен», – деді.

 Оның әкесі Алпарслан Курт ұзақ мерзімді ем қабылдаған балаларға арналған осындай жағымды және жігерлендіретін іс-шаралар үшін Денсаулық сақтау министрлігіне алғысын білдірді.

 Аурухана палатасындағы 10 жастағы Ада Мавус: «Біз өте жақсы уақыт өткіземіз. Мұғалімдер менің палатама келгенде, біз пианино ойнап, сурет саламыз», – деді.

 Оның анасы Хасет Тешоме Мавус та іс-шараларға риза екенін айтты. «Біз алғаш келгенде мұндай бағдарламалар болмады. Мұғалімдер келе бастағанда қатты қуандық. Балалар бәрінен алыстап, тез жалығады. Бұл іс-шаралар бізге күнді көңілді өткізуге көмектеседі. Қызым сурет салуды және музыканы жақсы көреді және бұл іс-шаралар оған үлкен әсер етті. Ауруханадағы балалар мектепті ұмытпауы керек. Мұғалімдер келгенде ойын мен музыка болады, бұл олардың көңіл-күйін көтереді», – деді ол.