Takriban watu tisa wameuawa baada ya gari moja kukanyaga umati wa watu kwenye tamasha la barabarani huko Vancouver, Canada, polisi wamethibitisha.
"Kufikia sasa, tunaweza kuthibitisha tisa wamekufa baada ya mtu kupita kwenye umati wa watu kwenye tamasha la Lapu Lapu usiku wa jana," Polisi wa Vancouver walisema katika taarifa.
Hapo awali, polisi walisema idadi ya watu waliuawa na wengine wengi kujeruhiwa baada ya dereva kupita kwenye umati wa watu kwenye tamasha la barabarani kwenye barabara ya E. 41st Avenue na Fraser, na kuongeza kuwa dereva wa gari hilo aliwekwa chini ya ulinzi.
Waziri Mkuu Mark Carney alisema katika chapisho kwenye mtandao wa kijamii wa X kwamba "amehuzunishwa" na "matukio ya kutisha".
Sherehe za kifilipino
"Ninatoa rambirambi zangu za dhati kwa wapendwa wa waliouawa na kujeruhiwa, kwa jamii ya Wafilipino wa Kanada, na kwa kila mtu huko Vancouver," alisema. "Sisi sote tunaomboleza pamoja nawe."
Gari hilo liliingizwa kwenye umati wa watu waliokusanyika kwa ajili ya Lapu Lapu Day Block Party, sherehe ya kila mwaka ya kumuenzi shujaa wa kwanza wa kitaifa wa Ufilipino.
Don Davies, mbunge anayewakilisha wilaya ya Vancouver Kingsway, aliandika kwenye X: "Nimesikia tu habari za kusikitisha za shambulio la kutisha kwenye tamasha la Lapu Lapu. Ninawaombea wahasiriwa wote na familia zao."
Waziri Mkuu wa British Columbia David Eby alisema "ameshtushwa na kuhuzunishwa" na habari hizo, huku meya wa jiji Ken Sim akisema "mawazo yetu yako kwa wale wote walioathirika na jamii ya Wafilipino ya Vancouver wakati huu mgumu sana."
