Takimi midis delegacioneve të Türkiyes, Rusisë dhe Ukrainës është planifikuar të fillojë në orën 13:00 me kohën lokale nën kryesimin e kryediplomatit turk, Hakan Fidan.

Sipas informacioneve të marra nga burime të Ministrisë së Jashtme të Türkiyes, takimi trepalësh Türkiye-Rusi-Ukrainë pritet të fillojë në orën 13:00 me kohën lokale.

Pritet që në takim, i cili do të kryesohet nga Ministri Fidan, të marrë pjesë edhe kreu i Organizatës Kombëtare të Inteligjencës Turke (MIT), İbrahim Kalın.

Delegacioni rus që do të marrë pjesë në takim përfshin këshilltarin e Presidentit Vladimir Putin, Vladimir Medinsky, zëvendësministrin e Jashtëm, Mikhail Galuzin, zëvendësministrin e Mbrojtjes, Aleksandr Fomin dhe shefin e Drejtorisë Kryesore të Shtabit të Përgjithshëm, Igor Kostyukov.

Ndërkaq, delegacioni ukrainas përfshin ministrin e Mbrojtjes, Rustem Umerov, zëvendësministrin e Jashtëm të Ukrainës, Sergiy Kyslytsya, zëvendësshefin e Shërbimit të Sigurisë së Ukrainës (SBU), Oleksandr Poklad dhe zëvendësshefin e Shërbimit të Inteligjencës së Jashtme, Oleh Luhovskyi.

Türkiye arriti t'i ulë palët në të njëjtën tryezë pas tri vitesh

Menjëherë pas luftës së përgjakshme që filloi në shkurt të vitit 2022, Türkiye i bashkoi Rusinë dhe Ukrainën në të njëjtën tryezë si në Antalya ashtu edhe në Istanbul në të njëjtin vit, dhe në maj të vitit 2025, ajo arriti t'i ulë delegacionet ruse dhe ukrainase në të njëjtën tryezë në Istanbul pas tri vitesh.

Negociatat midis Rusisë dhe Ukrainës u zhvilluan më 16 maj në Zyrën Presidenciale në Dolmabahçe të Istanbulit.

Të dyja palët ranë dakord të kryenin një shkëmbim të madh të të burgosurve "1.000 persona për 1.000 persona", paraqitja e pikëpamjeve të hollësishme mbi një armëpushim të mundshëm dhe më pas për të vazhduar negociatat.

Të dy vendet njoftuan se shkëmbimi i të burgosurve i rënë dakord në Istanbul u përfundua më 25 maj.