Ministria e Jashtme ruse njoftoi se ka hyrë në fuqi marrëveshja gjithëpërfshirëse e partneritetit strategjik e nënshkruar mes Rusisë dhe Koresë së Veriut në qershor.

Sipas Ministrisë së Jashtme ruse, protokolli për hyrjen në fuqi të marrëveshjes u firmos në Moskë nga zëvendësministri i Jashtëm rus, Andrey Rudenko, dhe homologu i tij nga Koreja e Veriut, Kim Jong Gyu.

Marrëveshja parashikon ndihmë të ndërsjellë ushtarake në rast të një sulmi ndaj njërës prej palëve dhe synon të kontribuojë ndërtimin e një rendi botëror multipolar, duke promovuar një sistem sigurie të pandarë në rajonin e Azisë Verilindore dhe Azi-Paqësorit.

Marrëveshja gjithëpërfshirëse e partneritetit strategjik midis Rusisë dhe Koresë së Veriut u nënshkrua gjatë vizitës së presidentit rus Vlladimir Putin në Korenë e Veriut në qershor.