Kryeministri spanjoll të mërkurën e përshkroi Izraelin si një "shtet gjenocidal" dhe tha se Spanja "nuk bën biznes me një vend të tillë", duke shënuar gjuhën e tij më të ashpër deri më tani për këtë çështje.

Gjatë një seance pyetje-përgjigje parlamentare në Madrid, Pedro Sanchez iu përgjigj kritikave nga Gabriel Rufian, një anëtar katalanas i parlamentit, i cili e akuzoi udhëheqësin socialist se mban lidhje tregtare me Izraelin pavarësisht luftës në Gaza.

"Dua ta sqaroj një gjë këtu, z. Rufian. Ne nuk bëjmë biznes me një shtet gjenocidal, nuk bëjmë", theksoi Sanchez.

"Unë besoj se një ditë, nga kjo platformë, e shpjegova saktësisht se për çfarë po flisnim kur u përmendën disa gjëra që nuk korrespondojnë me të vërtetën", shtoi ai.

Sipas raportit të medias lokale, kjo ishte hera e parë që Sanchez përdori publikisht termin "shtet gjenocidal", një frazë e përdorur shpesh nga partneri i tij i koalicionit të ekstremit të majtë, Sumar.

Udhëheqësja e Sumar dhe zëvendëskryeministrja e dytë, Yolanda Diaz, e ka akuzuar vazhdimisht Izraelin për gjenocid dhe ka bërë thirrje për ngrirjen e marrëdhënieve tregtare midis Spanjës dhe Izraelit.