Një sondazh i publikuar nga televizioni publik “Yle” tregon se shumica e partive parlamentare në Finlandë mbështesin njohjen e shtetit të Palestinës. Megjithatë, kundërshtimi nga dy parti qeverisëse po pengon arritjen e një vendimi të përbashkët.

Partia Social Demokrate (SDP) ka forcuar pozicionin e saj që nga maji, duke bërë thirrje për njohje të menjëhershme.

“Nëse Finlanda nuk e njeh Palestinën të paktën deri në kohën kur Franca synon ta bëjë këtë gjatë javës së OKB-së në vjeshtë, do të rreshtohet në anën e gabuar të historisë”, deklaroi Tytti Tuppurainen, kryetare e grupit parlamentar të SDP-së.

Edhe Partia e Koalicionit Kombëtar (NCP) dhe Partia Popullore Suedeze (SPP) janë pro njohjes, por kërkojnë një proces më të kujdesshëm.

“Shteti i Palestinës duhet të njihet në një moment që siguron paqe dhe stabilitet në rajon, si pjesë e një zgjidhjeje më të gjerë. Prioritet tani është të ndihmojmë në zbutjen e krizës humanitare në Gaza,” tha Jukka Kopra, kreu i grupit parlamentar të NCP-së.

Nga ana tjetër, Partia Finlandeze dhe Demokratët e Krishterë mbeten kundër.

“Rajoni nuk i plotëson kushtet për një zgjidhje me dy shtete, dhe kërcënimi nga terrorizmi ende ekziston”, deklaroi Jani Makela, përfaqësues i Partisë Finlandeze.

Të Gjelbrit, ndërkohë, e kanë kritikuar qeverinë për qëndrimin e saj ndaj zhvillimeve në Gaza.

“Qeveria po qëndron pasive përballë një gjenocidi – një qëndrim i tillë do ta njollosë rëndë historinë e Finlandës”, theksoi Oras Tynkkynen, udhëheqës i grupit parlamentar të të Gjelbërve.

Presidenti finlandez Alexander Stubb, të premten, e quajti situatën në Gaza “gjithnjë e më çnjerëzore” dhe e përshkroi urinë e shkaktuar nga njeriu si “të mjerueshme dhe të turpshme”.

Debati për njohjen e Palestinës është rindezur fuqishëm pas njoftimit të Francës se do ta njohë shtetin palestinez gjatë Asamblesë së Përgjithshme të Kombeve të Bashkuara në shtator.