Këshilli Evropian njoftoi të martën se ka nisur një procedurë disiplinore buxhetore kundër Austrisë, për shkak të deficitit të saj buxhetor të tepruar.

Ky mekanizëm, i njohur si procedura për deficit të tepruar (EDP), ka për qëllim t'i sigurojë që shtetet anëtare ta ruajnë ose ta rikthejnë disiplinën fiskale në buxhetet e tyre, sipas një deklarate të Këshillit Evropian.

Në deklaratë thuhet se masa disiplinore u shkaktua nga fakti që deficiti buxhetor i Austrisë arriti në 4,7% në vitin 2024.

“Këshilli gjithashtu miratoi një rekomandim për Austrinë, ku përcaktohet rruga dhe afatet e shpenzimeve neto që duhet të ndiqen për ta përfunduar deficitin e saj të tepruar deri në vitin 2028,” thuhet në deklaratë.

Sipas Këshillit, Austria duhet t'i paraqesë masat konkrete për uljen efektive të deficitit deri më 15 tetor.

“Austria duhet të sigurojë që shkalla nominale e rritjes së shpenzimeve neto të mos e kalojë 2,6% në vitin 2025, 2,2% në vitin 2026, 2,2% në vitin 2027 dhe 2,0% në vitin 2028,” thuhet më tej.

Austria kishte një deficit buxhetor prej 4,7% vitin e kaluar. Komisioni Evropian parashikon që deficiti të jetë 4,4% e Prodhimit të Brendshëm Bruto (PBB) këtë vit dhe 4,2% vitin e ardhshëm.

Rregullat fiskale të BE-së vendosin kufij për deficitet dhe borxhet publike të vendeve anëtare. Në kushte normale, deficiti buxhetor i shteteve anëtare nuk duhet të kalojë 3% të PBB-së, ndërsa borxhi publik nuk duhet të kalojë 60% të PBB-së.

Kur këta kufij tejkalohen, Komisioni Evropian duhet të njoftohet për masat që do të merren dhe të ndërmerret një luftë efektive kundër deficitit.