Presidenti i ShBA-së, Donald Trump, tha se Universiteti i Harvardit do të duhet ta ndryshojë mënyrën e tij të të vepruarit, pasi administrata e tij u përpoq ta ndalonte mundësinë e universitetit për të regjistruar studentë të huaj.

“Miliarda dollarë i janë paguar Harvardit. Sa qesharake është kjo? Miliarda… Dhe ata kanë 52 miliardë dollarë si fond. ...Pra, Harvardi do të duhet ta ndryshojë rrugën e tij”, u tha Trump gazetarëve në Shtëpinë e Bardhë.

Komentet e tij erdhën një ditë pasi Sekretarja e Departamentit të Sigurisë Kombëtare (DHS), Kristi Noem, tha se departamenti do t’i heqë universitetit mundësinë për të pranuar studentë të huaj.

Noem tha se administrata Trump po e mban Harvardin përgjegjës për “nxitje të dhunës, antisemitizmit dhe koordinim me Partinë Komuniste Kineze në kampusin e tij”.

Megjithatë, një gjyqtar amerikan të premten bllokoi përkohësisht administratën Trump nga revokimi i mundësisë së universitetit për të regjistruar studentë të huaj.

I pyetur nëse po shqyrton gjithashtu ndalimin e universiteteve të tjera nga pranimi i studentëve të huaj, Trump tha: “Po shqyrtojmë shumë gjëra”.

Administrata Trump ka kërcënuar të ngrijë fondet federale për shumë universitete, përfshirë Harvardin, duke përmendur si arsyetim protestat në kampuse në mbështetje të Palestinës dhe programeve të diversitetit, barazisë dhe përfshirjes (DEI).

Administrata ka tërhequr 3 miliardë dollarë fonde dhe ka kërcënuar t’i heqë Harvardit statusin e përjashtimit nga taksat.

Harvardi ka paditur administratën si përgjigje, duke pretenduar se ngrirja e fondeve shkel Amendamentin e Parë dhe ligjin federal, i cili e ndalon presidentin të urdhërojë drejtpërdrejt ose tërthorazi Shërbimin e të Ardhurave të Brendshme (IRS) të kryejë ose të ndërpresë një auditim ose hetim.