Presidenti amerikan Donald Trump deklaroi të premten se një marrëveshje për armëpushim mes Izraelit dhe Hamasit mund të arrihet javën e ardhshme, pas asaj që ai e cilësoi si një përgjigje “pozitive” nga grupi i rezistencës palestineze ndaj një propozimi amerikan, sipas raportimeve të mediave.
“Mund të ketë një marrëveshje për armëpushim në Gaza deri javën e ardhshme”, tha Trump për gazetarët në bordin e Air Force One, duke shtuar se ende nuk është informuar plotësisht për ecurinë e negociatave, sipas Arab News.
Hamasi konfirmoi se “ka dorëzuar përgjigjen e tij pozitive” te ndërmjetësit egjiptianë dhe katarezë dhe se është “plotësisht i gatshëm të hyjë menjëherë në një raund negociatash lidhur me mekanizmin e zbatimit të kësaj kornize.”
Një zyrtar i Hamasit deklaroi se grupi kërkon garanci për tërheqje të plotë të forcave izraelite nga Gaza dhe një armëpushim të qëndrueshëm.
Trump thuhet se ka premtuar një armëpushim fillestar 60-ditor, me mundësi zgjatjeje nëse është e nevojshme.
Nisma për armëpushim po zhvillohet mes vazhdimit të dhunës në terren.
Të paktën 20 palestinezë u vranë të premten ndërsa po përpiqeshin të merrnin ndihma, sipas autoriteteve në spitalin Nasser në Khan Younis.
Kombet e Bashkuara raportuan se 613 palestinezë janë vrarë gjatë muajit të fundit teksa përpiqeshin të siguronin ushqim.
Sulmet ajrore izraelite në zonën e Muwasit në Gaza vranë 15 persona, përfshirë tetë gra dhe një fëmijë, sipas spitaleve lokale. Ushtria izraelite tha se po shqyrton incidentet.
Lufta aktuale nisi më 7 tetor 2023, kur militantë të udhëhequr nga Hamasi sulmuan Izraelin, duke vrarë 1.200 persona dhe duke marrë rreth 250 pengje.
Zyrtarët e shëndetësisë në Gaza thonë se që prej atëherë, janë vrarë mbi 57.200 palestinezë, shumica gra dhe fëmijë.
Pavarësisht thirrjeve ndërkombëtare për armëpushim, Izraeli ka vazhduar luftën shkatërrimtare në Gaza, të cilën shumë organizata dhe institucione ndërkombëtare e kanë cilësuar gjenocidale.
Në nëntor të vitit të kaluar, Gjykata Penale Ndërkombëtare lëshoi urdhër-arreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant, për krime lufte dhe krime kundër njerëzimit në Gaza.
Ndërkohë, Izraeli po përballet edhe me një proces për gjenocid në Gjykatën Ndërkombëtare të Drejtësisë për fushatën ushtarake në këtë enklavë.
