Presidenti i UEFA-s Aleksander Ceferin theksoi të mërkurën rëndësinë strategjike të zyrës së re të UEFA-s në Istanbul në përgatitjen për atë që ai shpreson të jetë "kampionati evropian më i mirë ndonjëherë" në vitin 2032, i cili do të bashkëorganizohet nga Türkiye dhe Italia.

Duke folur në një darkë gala të mbajtur në Pallatin historik Çırağan në Istanbul përpara hapjes zyrtare të zyrës të enjten, Ceferin vlerësoi kulturën e thellë të futbollit, infrastrukturën dhe rekordin e suksesshëm të Türkiyes në organizimin e ngjarjeve të mëdha sportive.

"Të them sinqerisht, ardhja në Türkiye dhe ardhja në Istanbul është gjithmonë një përvojë super e këndshme për mua", tha Ceferin.

"Me gjithë historinë e tij dhe si i vetmi qytet në botë që lidh dy kontinente, Istanbuli të bën të ndihesh gjithmonë si në shtëpinë tënde", shtoi kreu i organizatës evropiane të futbollit.

Shefi i UEFA-s tha se zyra e re, e zhvilluar në bashkëpunim me Federatën Turke të Futbollit, simbolizon synimin e UEFA-s për të forcuar lidhjet me Türkiyen dhe për të siguruar organizimin e suksesshëm të EURO 2032.

"Ne duam të ndajmë përvojën tonë dhe kjo është arsyeja pse vendosëm të hapim një zyrë këtu së bashku me Federatën Turke të Futbollit", tha Ceferin.

"Sepse ne duam të kemi Kampionatin Evropian më të mirë ndonjëherë në 2032 në Türkiye dhe Itali. Ne duam të punojmë së bashku dhe mezi pres hapjen e nesërme", theksoi ai.

Ceferin shprehu shpresën për një finale të ëndrrave midis dy vendeve pritëse. "Mezi pres EURO 2032-shin. Uroj një finale mes Türkiyes dhe Italisë", tha ai.

Presidenti i UEFA-s përgëzoi gjithashtu përpjekjet e vazhdueshme të Türkiyes në organizimin e ngjarjeve të futbollit të klasit botëror. "Federata Turke e Futbollit dhe qeveria turke kanë qenë gjithmonë organizatorë të mirë të ngjarjeve të futbollit", vuri në dukje ai.

"Ju keni shumë ngjarje të kompeticioneve për klube, finale dhe e fundit ishte ngjarja më e madhe sportive në botë, finalja e Ligës së Kampionëve të UEFA-s në vitin 2023. Tani, mund të prisni finalen e Ligës Europa në 2026 dhe finalen e Ligës së Konferencës në 2027. Unë sinqerisht shpresoj që një nga klubet turke mund të luajë në një nga finalet", tha presidenti i UEFA-s