Kryeministrit izraelit Benjamin Netanyahu i është diagnostikuar një inflamacion në zorrë, për shkak të së cilës do të jetë në pushim treditor, njoftoi kabineti i tij.

Në njoftimin e kabinetit të Netanyahut thuhet se kryeministri është sëmurë gjatë natës pasi ka pësuar helmim nga ushqimi.

Duke e përshkruar gjendjen e tij shëndetësore si të mirë, kabineti bëri të ditur se “nën kujdesin e mjekëve të tij, kryeministri do të pushojë në shtëpi për tre ditët e ardhshme, prej nga do të vazhdojë të kryejë detyrat shtetërore”.

Sipas Kanalit 12, kryeministri nuk do të marrë pjesë në seancën e Knesset-it të dielën, as në gjyqin e tij në Gjykatën e Qarkut në Tel Aviv të planifikuar për të hënën.

Netanyahu paraqitet në gjykatë dy herë në javë për gjyqin e tij për korrupsion.

Netanyahu, gjyqi i të cilit filloi më 24 maj 2020, është lideri i parë izraelit që dëshmon si i akuzuar për vepër penale në historinë e shtetit.

Ai përballet gjithashtu me akuza për krime lufte dhe krime kundër njerëzimit, dhe Gjykata Ndërkombëtare Penale ka lëshuar urdhërarresti për të dhe ish-ministrin e Mbrojtjes, Yoav Gallant, në nëntor të vitit 2024 për krime në Gaza, ku që nga tetori 2023 janë vrarë pothuajse 59.000 njerëz, shumica gra dhe fëmijë.