Ukraina ka deklaruar se Rusia kreu një sulm të paprecedent gjatë natës, duke hedhur 728 dronë, shumica e të cilëve u drejtuan drejt rajonit të Volynit dhe qytetit Lutsk, në veriperëndim të vendit.

Sipas Forcave Ajrore të Ukrainës, 718 nga 728 dronët u rrëzuan me sukses nga mbrojtja ajrore, së bashku me 7 nga 13 raketat e lëshuara.

Guvernatori i Volynit, Ivan Rudnytskyi, njoftoi se rreth 50 dronë dhe 5 raketa u zbuluan në rajonin që kufizohet me Bjellorusinë dhe Poloninë. Ai shtoi se aktualisht po vazhdojnë punimet për shuarjen e zjarreve në disa depo dhe në një kompleks garazhesh.

Shërbimi Shtetëror i Emergjencave të Ukrainës konfirmoi më vonë se zjarret janë shuar dhe nuk raportohet për viktima.

Ndërkohë, Komanda Operative e Forcave të Armatosura Polake njoftoi në rrjetin X (ish-Twitter) se avionët polakë dhe të aleatëve u ngritën në ajër për të monitoruar situatën, por më vonë u rikthyen pasi rreziku u vlerësua si i ulët.

Ky sulm vjen vetëm pak ditë pasi Ukraina kishte deklaruar se Rusia kishte lëshuar 539 dronë në një sulm të mëparshëm, duke e bërë sulmin e fundit më të madhin deri më tani në përdorimin e mjeteve ajrore pa pilot.

Autoritetet ruse nuk kanë komentuar ende zyrtarisht mbi këtë sulm.