Ukraina pretendoi sot se një sulm rus me dron ndaj një autobusi që po transportonte punëtorë ka vrarë nëntë persona dhe ka plagosur 42 të tjerë.

Guvernatori i rajonit Dnipropetrovsk, Serhiy Lysak tha në Telegram se sulmi ka ndodhur në qytetin Marhanets në rajonin Dnipropetrovsk të Ukrainës.

"Dyzet e dy persona u plagosën si rezultat i një sulmi armik në një autobus në Marhanets. Këto janë shifrat e fundit. Pothuajse të gjithë të plagosurit janë shtruar në spital, vetëm tre po marrin trajtim ambulator", tha ai.

"Sulmi i armikut mori nëntë jetë. Ngushëllimet e mia për familjet dhe të dashurit e tyre", shtoi Lysak.

Rajoni Dnipropetrovsk ka qenë objektiv i shpeshtë i sulmeve ajrore ruse, pasi strehon disa ndërmarrje të mëdha ukrainase të mbrojtjes, përfshirë ato të prodhimit të dronëve dhe raketave.

Moska nuk i ka komentuar menjëherë pretendimet e Kievit.