Një shfaqje artistike e veçantë u mbajt në sheshin historik “Shatërvan” të Prizrenit, ku artistë nga Shkupi u shndërruan në skulptura të gjalla përmes bojës dhe kostumeve artistike.

Performanca, pjesë e Festivalit të Teatrit në Ajër të Hapur “Prizrenfest”, u prezantua nga trupa teatrale “Teatrosk” nga Maqedonia e Veriut, e cila njihet për eksperimentimin me forma të reja të shprehjes artistike.

Artistët qëndruan pa lëvizur për orë të tëra, duke ofruar një përvojë vizuale unike për kalimtarët, vendasit dhe turistët, e sidomos për fëmijët që e pritën me kureshtje dhe entuziazëm.

Shfaqja e skulpturave të gjalla do të vazhdojë deri më 28 korrik, në kuadër të programit të festivalit.

“Teatrosk” është i njohur për Festivalin e Skulpturës që organizon çdo vit në Shkup, si dhe për ekspozimin e shfaqjeve të tij në vende të ndryshme të Evropës.