Udhëheqësi Suprem i Iranit, Ajatollah Ali Khamenei, tha se vendi i tij është i aftë t’u japë “goditje edhe më të forta” ShBA-së dhe Izraelit në përgjigje të çdo sulmi tjetër ushtarak. 

Duke folur gjatë një takimi me zyrtarë gjyqësorë nga i gjithë Irani, Khamenei tha se Washingtoni dhe Tel Avivi synojnë të dobësojnë udhëheqjen e Iranit duke vrarë figura kyç dhe duke destabilizuar vendin përmes grupeve të opozitës dhe qelizave të fjetura.

“Por, qëndrimi i mbajtur nga populli iranian nga të gjitha sferat e jetës i ka penguar këto plane”, tha ai.

“Zoti i prishi skemat e tyre dhe populli u ngrit për të mbrojtur vendin”, tha Khamenei, duke theksuar rëndësinë e ruajtjes së unitetit kombëtar.

Udhëheqësi iranian tha se Izraeli u detyrua ta kërkonte ndihmën e ShBA-së pas përgjigjes së vendosur të Iranit ndaj sulmeve të fundit.

“Nëse regjimi sionist (Izraeli) do të ishte i aftë të mbronte veten, nuk do t’i ishte drejtuar ShBA-së në këtë mënyrë, por e kuptoi se nuk mund t’i rezistojë Iranit”, tha ai.

“Sigurisht, që tani e tutje, goditje edhe më të mëdha mund t’u jepen SHBA-së dhe të tjerëve”, shtoi Khamenei.

Ai gjithashtu përmendi sulmin me raketa të Iranit në Bazën Ajrore amerikane Al-Udeid në Katar si shembull të vendosmërisë së Teheranit.

“Baza e sulmuar nga Irani ishte një bazë rajonale amerikane jashtëzakonisht e ndjeshme”, tha ai.

Më 13 qershor, Izraeli, me mbështetjen e ShBA-së, nisi një ofensivë 12-ditore ndaj Iranit, duke shënjestruar objekte ushtarake, bërthamore dhe civile, si dhe komandantë të lartë ushtarakë dhe shkencëtarë bërthamorë.

Irani u hakmor me sulme me raketa dhe dronë ndaj objekteve ushtarake dhe të inteligjencës izraelite. Një armëpushim i ndërmjetësuar nga ShBA-ja midis Teheranit dhe Tel Avivit u njoftua më 24 qershor.