Algjeria dhe Italia nënshkruan të mërkurën 14 marrëveshje dhe memorandume mirëkuptimi në disa sektorë strategjikë, përfshirë sigurinë dhe mbrojtjen.

Ceremonia e nënshkrimit u zhvillua në Pallatin Villa Doria Pamphilj në Romë, në prani të Presidentit algjerian Abdelmadjid Tebboune dhe Kryeministres italiane Giorgia Meloni, sipas televizionit shtetëror algjerian.

Marrëveshjet përfshijnë fushat e bujqësisë, mbrojtjes, energjisë, luftës kundër terrorizmit, kulturës, telekomunikacionit, prodhimit të filmave, bashkëpunimit shkencor, të drejtave të personave me aftësi të kufizuara dhe koordinimit në operacionet e shpëtimit detar.

Ndër marrëveshjet e nënshkruara është edhe një Memorandum Mirëkuptimi për krijimin e “Qendrës Enrico Mattei” për trajnime, kërkime dhe inovacion në bujqësi në Algjeri, së bashku me një marrëveshje tjetër që synon forcimin e bashkëpunimit në bujqësi, peshkim dhe përpunimin ushqimor.

Në fushën e sigurisë, të dyja palët nënshkruan një marrëveshje për rritjen e bashkëpunimit në luftën kundër terrorizmit dhe ndërprerjen e burimeve të financimit të tij përmes shkëmbimit të ekspertizës dhe informacionit.

Në fushën kulturore, u nënshkrua një marrëveshje për prodhim të përbashkët filmash për ta mbështetur krijimtarinë kulturore.

Të dyja vendet nënshkruan gjithashtu një program ekzekutiv për bashkëpunim shkencor dhe teknik në mbrojtjen e trashëgimisë kulturore, si dhe një plan operacional për koordinimin e operacioneve të kërkim-shpëtimit detar brenda zonave përkatëse të përgjegjësisë rajonale.

Në fushën e investimeve, u nënshkrua një Memorandum Mirëkuptimi ndërmjet Agjencisë Algjeriane për Promovimin e Investimeve dhe agjencisë shtetërore italiane për zhvillim “Invitalia” për të forcuar bashkëpunimin në tërheqjen e investimeve dhe mbështetjen e partneriteteve ekonomike.

Gjatë takimit u nënshkrua gjithashtu një marrëveshje ndërmjet kompanisë shtetërore algjeriane të naftës Sonatrach dhe grupit energjetik italian Eni për ta thelluar partneritetin në sektorin e energjisë.

Tebboune mbërriti në Romë të martën për një vizitë zyrtare triditore. Të mërkurën, ai zhvilloi bisedime dypalëshe me homologun italian Sergio Mattarella dhe Kryeministren Meloni.

Më herët gjatë ditës, në Romë u hap një forum biznesi algjero-italian, që mblodhi më shumë se 500 pjesëmarrës, përfshirë drejtues biznesesh, ekzekutivë kompanish dhe ekspertë.