Tetë persona u vranë dhe mbi 28 u plagosën në zjarrin e ushtrisë izraelite që shënjestroi civilët që prisnin për shpërndarjen e ndihmës në pjesën qendrore të Gazës të mërkurën.

Ushtria izraelite hapi zjarr ndaj kërkuesve të ndihmave në një pikë shpërndarjeje ndihmash pranë Korridorit Netzarim, duke vrarë pesë persona dhe duke plagosur tetë të tjerë, thanë burime mjekësore për Anadolu.

Tre persona u vranë dhe më shumë se 20 u plagosën nga zjarri izraelit ndërsa prisnin për shpërndarjen e ndihmës në një pikë tjetër shpërndarjeje në veri të Rafahs, në jug të Gazës, sipas një deklarate nga një komision lokal i ambulancës dhe shërbimeve të emergjencës.

Sipas shifrave të fundit të publikuara nga Ministria e Shëndetësisë, të paktën 1.179 persona u vranë dhe mbi 7.950 u plagosën nga zjarri i ushtrisë izraelite ndërsa kërkonin ndihmë në Rripin e Gazës.

Ushtria izraelite, duke hedhur poshtë thirrjet ndërkombëtare për armëpushim, ka ndërmarrë një ofensivë brutale në Gaza që nga 7 tetori 2023, duke vrarë më shumë se 60.000 palestinezë, shumica prej tyre gra dhe fëmijë. Bombardimet e pamëshirshme kanë shkatërruar enklavën dhe kanë çuar në mungesë ushqimesh.

Në nëntorin e kaluar, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.