Amerika Birləşmiş Ştatları prezidenti Donald Tramp keçmiş müttəfiqi İlon Maskın yeni siyasi partiya yaratmasını “gülünc” adlandırıb. D.Tramp bu fikrini jurnalistlərlə söhbəti zamanı səsləndirib.

Dünyanın ən varlı adamı və 2024-cü il prezident seçkilərində Trampın əsas siyasi donorlarından biri olan İlon Mask Respublikaçıların büdcə xərclərini azaltmaq təşəbbüslərinə rəhbərlik etdiyi Hökumətin Səmərəliliyi Departamentindən (DOGE) ayrıldıqdan sonra prezidentlə münasibətlərini kəskin şəkildə kəsib.

İ.Mask ABŞ-ın daxili xərclərini əhatə edən genişmiqyaslı büdcə planının ölkə borcunu artıracağını bildirib və bu plana səs verən millət vəkillərinin seçkilərdə məğlub olması üçün əlindən gələni edəcəyini açıqlayıb.

Şənbə günü isə o, “Tesla”, “SpaceX” və “X” platformasının sahibi kimi bu məqsədini həyata keçirmək üçün “Amerika Partiyası” adlı yeni siyasi partiya yaratdığını elan edib.

Donald Tramp “Truth Social” platformasında paylaşım edərək bildirib ki, üçüncü bir partiyanın yaradılması ölkədə qarışıqlığa səbəb ola bilər.

ABŞ-ın maliyyə naziri Skot Bessent isə İlon Maskın siyasətə müdaxilə cəhdlərinə münasibət bildirərək, onun şirkətlərinə fokuslanmasının daha məqsədəuyğun olduğunu deyib. CNN-ə müsahibə verən Skot Bessent deyib: “İnanıram ki, rəhbərlik etdiyi müxtəlif şirkətlərin idarə heyətləri onun geri addım atmasını və bu şirkətlərə daha çox diqqət yetirməsini istəyir.”

Qeyd edək ki, İlon Mask korporativ öhdəliklərinə daha çox vaxt ayırmaq məqsədilə may ayında Hökumətin Səmərəliliyi Departamentindən (DOGE) ayrılıb.