Federal Təhqiqat Bürosu (FTB) ABŞ-ın İsraildəki səfirliyinə molotov kokteyli atmağa cəhd edən Amerika vətəndaşını saxlayıb. Bu barədə ABŞ Ədliyyə Nazirliyi ictimaiyyəti məlumatlandırıb.

Məlumata görə, 28 yaşlı Cozef Neumayer səfirlik binasını yandırmağa cəhd etdiyi üçün bazar günü mühakimə olunub. FTB-nin xüsusi agentləri C.Neumayeri Nyu-Yorka gələn kimi saxlayıblar.

Cozef Neumayer Nyu-Yorkun Şərq Bölgəsindəki məhkəmədə dindirilib və hakim onun saxlanılmasına qərar verib. Məlumata əsasən, Neumayer aprel ayında İsrailə gedib və mayın 19-da kustar üsulla hazırlanmış molotov kokteyli ilə ABŞ-ın İsraildəki səfirliyinə yaxınlaşıb.

Təhdid mesajları

Cozef Neumayerin sosial şəbəkələrdəki paylaşımları arasında “Tel-Əvivdəki səfirliyi yandırmaqda mənə qoşulun” kimi təhdid mesajları yer alıb. Bundan əlavə, Neumayerin ABŞ prezidenti Donald Trampın həyatını təhdid etdiyi güman edilən digər yazıları da aşkarlanıb.

ABŞ-ın ədliyyə naziri Pamela Bondi deyib: “Nazirlik bu cür zorakılığa dözməyəcək və Cozef Neumayeri qanun çərçivəsində mühakimə edəcək.”

FTB rəhbəri Kaş Patel hadisəni “iyrənc zorakılıq aktı” adlandırıb.

Ədliyyə Nazirliyinin məlumatına görə, əgər Neumayer cinayətkar olaraq təqsirli bilinərsə, 5 ildən 20 ilə qədər həbs cəzasına məhkum oluna bilər.

Qeyd edək ki, Neumayerin Təl-Əvivdəki səfirliyə hücum cəhdindən iki gün sonra, Vaşinqtondakı Yəhudi muzeyi qarşısında İsrail səfirliyinin iki əməkdaşı güllələnib.