Avionët luftarak izraelitë kanë goditur Spitalin Baptist Al-Ahli në Gazën qendrore, duke shkatërruar ndërtesën kryesore të pritjes dhe duke e kthyer spitalin jashtë shërbimit mes sulmeve ajrore të vazhdueshme ndaj enklavës palestineze.

Korrespondenti për Anadolu në terren tha se dy raketat goditën departamentin e pritjes, duke shkaktuar zjarre dhe dëme të rënda në repartin e urgjencës, si dhe në laboratorin dhe farmacinë.

Stafi mjekësor në vendngjarje konfirmoi se spitali është jashtë shërbimit dhe nuk mund të presë më viktima të sulmeve ajrore të vazhdueshme të Izraelit.

Spitali, i vendosur në lagjen Zeitoun të qytetit të Gazas, ka qenë një objekt jetësor për më shumë se 1 milion palestinezë, veçanërisht pas shkatërrimit të disa spitaleve të mëdha në enklavë që nga tetori i vitit 2023.

Zyra për Media e Qeverisë në Gaza tha se Izraeli "ka kryer një krim të ri të tmerrshëm lufte", duke goditur një objekt që strehonte pacientë, civilë të plagosur dhe personel mjekësor.

"Ky agresion frikacak nuk është i pari i këtij lloji”, theksoi zyra për media, duke kujtuar bombardimin e 17 tetorit të vitit 2023 në të njëjtin spital, i cili la 471 palestinezë të vdekur dhe qindra të tjerë të plagosur.