Në një intervistë ekskluzive për TRT Balkan, në margjinat e Forumit Diplomatik të Antalias, presidentja e Kosovës Vjosa Osmani tha se Serbia është i vetmi burim paqëndrueshmërie në rajon.

Duke komentuar reagimet serbe ndaj paktit të mbrojtjes Kosovë-Shqipëri-Kroaci, Osmani tha se Serbia gjithmonë ankohet dhe përdor propagandën, ndërkohë që vazhdon përpjekjet për destabilizimin e vendeve të rajonit.

“Serbia e ka sulmuar Kosovën përmes akteve të agresionit dhe akteve të terrorizmit. Serbia është përpjekur ta shkatërrojë Bosnjë e Hercegovinën nga brenda, duke e destabilizuar atë. Serbia shkakton probleme ndaj Kroacisë dhe vendeve të tjera në rajon. Pra, është shumë, shumë e qartë për të gjithë ne në Ballkanin Perëndimor se kush është i vetmi burim i paqëndrueshmërisë, dhe ai është Serbia”, deklaroi Osmani.

Presidentja e Kosovës tha se me veprimet e tij, Vuçiq po cenon paqen për të cilën po kontribuon dhe përpiqet fort edhe Türkiye dhe presidenti i saj Erdoğan.

“Türkiye ka kontribuar shumë për paqen dhe stabilitetin në rajonin tonë, dhe Presidenti Erdoğan personalisht është angazhuar për t'u siguruar që kjo paqe dhe ky stabilitet të ruhet. Megjithatë, veprimet e Vuçiqit po rrezikojnë gjithashtu mbështetjen dhe kontributin afatgjatë që Presidenti Erdoğan i ka dhënë rajonit tonë, veçanërisht Kosovës dhe Bosnjë dhe Hercegovinës”, tha Osmani.

Presidentja Osmani tha se po vazhdojnë bisedimet që edhe vende të tjera t’i bashkohen marrëveshjes tripalëshe të mbrojtjes Kosovë-Shqipëri-Kroaci, por edhe për marrëveshje të veçanta dypalëshe.