Zjarret vijojnë të përfshijnë rajonet e Evropës Jugore të hënën, teksa temperaturat e larta vazhdojnë në disa zona, ndërsa të tjera kanë nisur të ndiejnë lehtësim nga vala e të nxehtit.

Shqipëria po përballet me zjarre serioze që nga e premtja, ndërsa flakët vazhdojnë të përhapen rreth qytetit jugor të Himarës edhe të hënën, sipas transmetuesit publik RTSh.

Zjarrfikësit, policia dhe ekipet e emergjencave civile janë në terren për më shumë se 60 orë, pasi flakët rinisin çdo herë që forcohet era.

Situata e zjarreve në Bullgari po përmirësohet, megjithatë zjarri pranë fshatit jugperëndimor Strumyani mbetet “jashtëzakonisht i madh” dhe “i përhapur”, tha zëvendësministri i Brendshëm Tony Todorov, sipas Agjencisë Bullgare të Lajmeve.

Edhe pse nuk raportohen si kërcënuese, zjarre aktive janë regjistruar edhe në rajone të tjera, përfshirë Pernik, Pllovdiv dhe Yambol.

“Gjatë 24 orëve të fundit, janë shuar 269 zjarre. Zjarri në Strumyani aktualisht është më i rëndi. Zjarri mund të përhapet në jug dhe lindje drejt Parkut Pirin”, tha Todorov gjatë një konference për media.

Edhe Serbia jugore është përballur me zjarre gjatë javës së kaluar, ndërsa rreziku mbetet ende i lartë, sipas transmetuesit RTS.

Në qytetin e Vranjës, ku është shpallur gjendja e jashtëzakonshme, situata e zjarreve raportohet se po stabilizohet ndërsa flakët aktive po shuhen.

Një zjarr shpërtheu gjithashtu të dielën mbrëma në departamentin jugor francez Alpes-Maritimes, duke djegur rreth 8.000 metra katrorë (rreth 2 hektarë) para se të shuhej, sipas transmetuesit BFM TV.

Shërbimi kombëtar i motit në Francë, Meteo-France, ka lëshuar paralajmërime për rrezik të lartë dhe shumë të lartë zjarresh për të hënën përgjatë bregdetit Mesdhetar, me pesë departamente në alarm të lartë dhe dy në alarm shumë të lartë.

Duke luftuar zjarret në disa rajone të dielën, Greqia pritet të përballet me mot më të freskët dhe reshje shiu, edhe pse temperaturat parashikohen të arrijnë sërish deri në 40°C në mbarë vendin, sipas mediave lokale.

Agjencia spanjolle e motit Aemet ka lëshuar paralajmërime portokalli për disa rajone të hënën, pasi temperaturat parashikohen të arrijnë deri në 40°C.

Finlanda gjithashtu shënoi të dielën ditën e 16-të radhazi me temperatura mbi 30 gradë Celsius, sipas transmetuesit YLE.

Ndërkohë, Instituti Shtetëror Hidrometeorologjik i Kroacisë ka lëshuar paralajmërime për reshje të dendura dhe stuhi.