Bashkëpunimi energjetik midis Türkiyes dhe Azerbajxhanit jo vetëm që u sjell dobi të dy vendeve, por gjithashtu forcon sigurinë energjetike në gjithë rajonin dhe Evropën, tha Presidenti turk Recep Tayyip Erdoğan në një mesazh dërguar Javës së Energjisë në Baku.

Zhvillimet e fundit gjeopolitike globale kanë nënvizuar edhe një herë rëndësinë e bashkëpunimit Türkiye-Azerbajxhan në sigurinë energjetike, tha Erdoğan të hënën në mesazhin, i cili u lexua nga Ministri turk i Energjisë dhe Burimeve Natyrore, Alparslan Bayraktar, gjatë Javës së Energjisë në Baku, që po zhvillohet në kryeqytetin e Azerbajxhanit. 

Ky bashkëpunim, i shënuar nga projekte kyç infrastrukturore si Baku-Tbilisi-Ceyhan dhe Kaukazi Jugor (i njohur edhe si tubacionet Baku-Tbilisi-Erzurum) dhe Tubacioni i Gazit Natyror Trans-Anatolian (TANAP), jo vetëm që i sjell dobi Türkiyes dhe Azerbajxhanit, por gjithashtu vazhdon ta forcojë sigurinë energjetike në rajon dhe Evropë”, shtoi Erdoğan.

Presidenti turk tha se tubacioni Igdir-Nakhçivan, i përuruar në mars, është shembulli më i fundit i bashkëpunimit të gjatë dhe të suksesshëm energjetik midis dy vendeve.

“Hyrja në funksion e tubacionit ka forcuar sigurinë e furnizimit me energji në rajonin e Nakhçivanit dhe na ka bërë më të fortë së bashku”, tha ai.

Projekte strategjike

Erdoğan shtoi se rritja e lidhjes së energjisë elektrike midis Türkiyes dhe Azerbajxhanit është një tjetër projekt me rëndësi strategjike.

Duke vënë në dukje se kapacitetet e ndërlidhjes midis Türkiyes dhe Nakhçivanit, si dhe Türkiyes dhe Gjeorgjisë, gjithashtu duhet të rriten, Erdoğan tha:

"Ne kemi nënshkruar një memorandum mirëkuptimi mbi bashkëpunimin për transmetimin dhe tregtinë e energjisë elektrike të gjelbër për të krijuar një linjë të re ndërlidhëse të energjisë elektrike midis Türkiyes, Azerbajxhanit, Gjeorgjisë dhe Bullgarisë."

"Ne synojmë ta përfundojmë këtë projekt, një hap tjetër historik për sigurinë energjetike dhe prosperitetin e rajonit tonë, sa më shpejt të jetë e mundur," shtoi ai.

Erdoğan tha se ekziston potencial i konsiderueshëm për projekte të reja të gazit natyror midis dy vendeve.

"Azerbajxhani, i cili prej kohësh ka furnizuar vëllime të konsiderueshme gazi si për Türkiyen ashtu edhe për Evropën, luan një rol strategjik në tregun global të energjisë, një rol që është veçanërisht i rëndësishëm në kushtet aktuale," shpjegoi ai.

"Në periudhën e ardhshme, ne kemi një mundësi të rëndësishme për ta forcuar bashkëpunimin tonë në eksportin e gazit turkmen përmes Azerbajxhanit dhe Türkiyes në një mënyrë që u sjell dobi të gjitha palëve," tha ai. 

“Ky projekt do të ndihmojë në diversifikimin e rrugëve të furnizimit dhe do të kontribuojë në prosperitetin rajonal."