Presidenti amerikan Donald Trump dislokoi të shtunën 2.000 trupa për të përballuar protestat në rritje kundër bastisjeve të agjentëve të imigracionit në zonën e Los Angelesit, një lëvizje që guvernatori i Kalifornisë e cilësoi si "qëllimisht provokuese".

Agjentët federalë u përplasën me turma të zemëruara në një periferi të Los Angelesit ndërsa protestat vazhduan për të dytën natë radhazi të shtunën, duke përdorur granata shokuese dhe duke mbyllur pjesë të një autostrade gjatë operacioneve kundër imigrantëve të parregullt, raportuan mediat.

Përplasja ndodhi në Paramount, ku protestuesit ishin mbledhur pranë një dyqani Home Depot që përdorej si bazë nga agjentët federalë të imigracionit, sipas raportimeve të Fox 11.

Ata u përballën me agjentë federalë me maska gazi, të cilët hodhën granata shokuese dhe gaz lotsjellës ndaj turmës, sipas raportimeve të mediave dhe postimeve në rrjetet sociale.

Që prej marrjes së detyrës në janar, republikani Trump ka zbatuar një premtim për të ndërmarrë masa të ashpra kundër hyrjes dhe qëndrimit të emigrantëve të parregullt, të cilët ai i ka krahasuar me "përbindësha" dhe "kafshë".

Vonë të shtunën, Trump nënshkroi një urdhër për të dislokuar 2.000 pjesëtarë të Gardës Kombëtare “për të trajtuar mungesën e rendit që është lënë të kalbet”, tha në një deklaratë sekretarja e shtypit të Shtëpisë së Bardhë, Karoline Leavitt.

“Administrata Trump ka një politikë zero tolerance ndaj sjelljeve kriminale dhe dhunës, veçanërisht kur kjo dhunë është e drejtuar ndaj oficerëve të zbatimit të ligjit që po kryejnë detyrën e tyre.”

Rreth një orë para se Shtëpia e Bardhë të konfirmonte vendimin, guvernatori demokrat i Kalifornisë, Gavin Newsom, deklaroi se kundërshtonte këtë veprim.

“Ajo lëvizje është qëllimisht provokuese dhe do të përshkallëzojë vetëm tensionet,” shkroi ai në platformën X. “Ne jemi në koordinim të ngushtë me qytetin dhe qarkun, dhe aktualisht nuk ka ndonjë nevojë të pambuluar.”

Protestat shpërthyen një ditë pasi agjentët e imigracionit të maskuar dhe të armatosur zhvilluan bastisje në vende pune në disa zona të Los Angelesit, duke tërhequr turma të zemëruara dhe duke shkaktuar përplasje disa orëshe.

‘Ligji dhe rendi do të mbizotërojë’

Kryetarja e Bashkisë së LA-së, Karen Bass, pranoi se disa banorë të qytetit “po ndihen të frikësuar” pas aksioneve federale për zbatimin e ligjeve të imigracionit.

“Çdokush ka të drejtë të protestojë në mënyrë paqësore, por ta bëjmë të qartë: dhuna dhe shkatërrimi janë të papranueshme dhe përgjegjësit do të mbahen përgjegjës”, shkroi ajo në X.

Zëvendësdrejtori i FBI-së, Dan Bongino, tha se janë bërë disa arrestime pas përplasjeve të së premtes.

“Po sillni kaos, do të sjellim prangat. Ligji dhe rendi do të mbizotërojë”, njoftoi ai në X.

Të shtunën, mes thirrjeve që agjentët e ICE-së të largohen, disa protestues valëvitën flamuj meksikanë, ndërsa të tjerë dogjën një flamur amerikan, raportoi Los Angeles Times.

Blloqe betoni dhe karroca të përmbysura shërbyen si barriera të improvizuara në rrugë.

Një turmë rrethoi një autobus të Shërbimit të Marshalëve të ShBA-së që po dilte nga një autostradë aty pranë, me autoritetet që më pas mbyllën hyrje-daljet në autostradë për të ndaluar përhapjen e protestuesve dhe hyrjen e të tjerëve.

Shtëpia e Bardhë ka marrë një qëndrim të ashpër kundër protestave, me zëvendësshefin e stafit Stephen Miller që i cilësoi ato si “një kryengritje kundër ligjeve dhe sovranitetit të Shteteve të Bashkuara”.

Los Angeles, qyteti i dytë më i populluar në ShBA, është një nga metropolet më të larmishme të vendit.

Periferia e Paramount, me rreth 50.000 banorë, është 82 për qind hispanike ose latine, sipas të dhënave të Regjistrimit të Popullsisë së ShBA-së.