Sulmet izraelite në të gjithë Gazën që nga mëngjesi i së martës kanë vrarë 37 palestinezë dhe kanë plagosur mbi 200 të tjerë, përfshirë 19 viktima pranë një pike shpërndarjeje ndihmash të mbështetur nga Izraeli, sipas burimeve mjekësore.

Një burim mjekësor i tha agjencisë Anadolu se 19 palestinezë humbën jetën dhe mbi 200 të tjerë u plagosën kur forcat izraelite hapën zjarr ndaj civilëve që ishin mbledhur për të marrë ndihma në një pikë shpërndarjeje të mbështetur nga Izraeli, pranë korridorit Netzarim, në jug të qytetit të Gazës.

Dëshmitarët thanë se edhe dronë kuadrokopterë izraelitë hapën zjarr ndaj civilëve që kërkonin ndihmë pranë vendit.

Një tjetër burim mjekësor tha se edhe 12 persona të tjerë u vranë nga sulmet ajrore izraelite në qytetin Jabalia, në veri të Gazës.

Tre anëtarë të një familjeje humbën jetën kur ushtria izraelite bombardoi një tendë ku strehoheshin personat e zhvendosur në Khan Younis, në jug të Gazës, ndërkohë që sulme të tjera goditën shtëpi dhe objekte të Gjysmëhënës së Kuqe në Deir al-Balah, në qendër të Gazës, duke shkaktuar edhe tre viktima të tjera.

Sulmet ndodhën ndërsa dronë izraelitë hodhën bomba tymuese mbi zonat lindore të qytetit të Gazës, raportoi agjencia zyrtare e lajmeve Wafa.

Ushtria izraelite, duke refuzuar thirrjet ndërkombëtare për armëpushim, ka zhvilluar një ofensivë brutale ndaj Gazës që nga tetori i vitit 2023, duke vrarë afro 55.000 palestinezë, shumica gra dhe fëmijë.

Në nëntorin e kaluar, Gjykata Penale Ndërkombëtare (GjPN) lëshoi urdhërarreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me një padi për gjenocid në Gjykatën Ndërkombëtare të Drejtësisë (GjND) për luftën e tij kundër enklavës.