Ukraina njoftoi të mërkurën se të paktën tre persona janë vrarë dhe 60 janë plagosur nga një sulm ajror me dronë rusë gjatë natës në qytetin Harkiv. 

“Në qytetin Harkiv, dy persona kanë humbur jetën, 60 të tjerë janë plagosur, përfshirë nëntë fëmijë të moshës nga dy deri në 15 vjeç,” tha guvernatori Oleh Synyehubov në një deklaratë në Telegram, duke njoftuar më vonë se një nga të plagosurit ka ndërruar jetë nga plagët e marra.

Duke theksuar se sulmet ishin të përqendruara në rrethet Slobidskyi dhe Osnovianskyi të Harkivit, Synyehubov bëri të ditur se Rusia kishte lëshuar 15 dronë.

Ai shtoi se në sulm janë dëmtuar nëntë ndërtesa banimi, tre shtëpi private, 13 automjete dhe një fabrikë.

Kryetari i Harkivit, Ihor Terehov, tha se sulmi ndodhi rreth mesnate sipas orës lokale, dhe se shërbimet e urgjencës dhe vullnetarët kanë punuar për të përballuar situatën.

Forcat ajrore të Ukrainës më vonë njoftuan në Telegram se mbrojtja ajrore kishte rrëzuar 49 nga 85 dronët që Rusia kishte lëshuar gjatë natës.

Harkivi, qyteti i dytë më i madh në Ukrainë dhe rreth 30 kilometra nga kufiri me Rusinë, është rregullisht në shënjestër të sulmeve ajrore në këtë luftë që zgjat tashmë prej tre vitesh.

Autoritetet ruse nuk kanë komentuar mbi pretendimet e Ukrainës.