Presidenti kinez Xi Jinping tha sot se Bashkimi Evropian duhet të "bëjë zgjedhje të sakta strategjike", duke u kërkuar udhëheqësve kryesorë të bllokut të forcojnë "besimin dhe komunikimin" mes pasigurisë globale.

Në fjalën e tij hapëse në samitin e 25-të BE-Kinë që filloi në Sallën e Madhe të Popullit në Pekin, Xi tha se udhëheqësit kinezë dhe evropianë duhet të përmbushin pritjet e popullit, raportoi transmetuesi shtetëror CCTV.

Udhëheqësi kinez, së bashku me kryeministrin Li Qiang, u takuan me presidenten e Komisionit Evropian Ursula von der Leyen dhe kreun e Këshillit Evropian Antonio Costa.

Respekti i ndërsjellë, kërkimi i terrenit të përbashkët duke rezervuar dallimet, bashkëpunimi i hapur, përfitimi i ndërsjellë dhe rezultatet fitimprurëse për të dyja palët duhet të respektohen në zhvillimin e ardhshëm të marrëdhënieve Kinë-BE, ka thënë Xi.

Duke theksuar se si Kina ashtu edhe Evropa janë forca konstruktive që mbështesin multilateralizmin dhe bashkëpunimin e hapur, ai ka thënë se "sa më e rëndë dhe komplekse të jetë situata ndërkombëtare, aq më shumë Kina dhe Evropa duhet të forcojnë komunikimin, të rrisin besimin e ndërsjellë dhe të thellojnë bashkëpunimin, në mënyrë që t'i ofrojnë më shumë stabilitet dhe siguri botës".

"Ne duhet ta kuptojmë fort drejtimin e saktë të zhvillimit të marrëdhënieve Kinë-Evropë dhe të punojmë së bashku për të hapur një periudhë më të ndritshme për 50 vitet e ardhshme për marrëdhëniet Kinë-Evropë", ka pohuar Xi.

"Përballë evolucionit të përshpejtuar të ndryshimeve shekullore në botë dhe situatës ndërkombëtare të ndryshimeve dhe kaosit të ndërthurur, udhëheqësit e Kinës dhe BE-së duhet të demonstrojnë edhe një herë largpamësinë dhe përgjegjësinë e tyre dhe të bëjnë zgjedhje të sakta strategjike që përmbushin pritjet e njerëzve dhe i rezistojnë provës së historisë", ka thënë ai.

Samiti kyç njëditor pritet të dominohet nga çështje të pazgjidhura që variojnë nga mosmarrëveshjet tregtare deri te lufta Rusi-Ukrainë. Çështjet e çekuilibrit tregtar, aksesit në treg dhe metaleve të rralla janë gjithashtu në agjendë.

Von der Leyen, nga ana e saj, e ka quajtur samitin një mundësi për të "përparuar dhe ribalancuar marrëdhënien tonë".

"Jam e bindur se mund të ketë një bashkëpunim të dobishëm reciprokisht", tha ajo në një postim në X pak para samitit.

Takimi po mbahet ndërsa të dy palët përkujtojnë 50 vjet të lidhjeve diplomatike, me tregtinë vjetore që është më shumë se 860 miliardë dollarë.