“Yonhap” xəbər agentliyinin Cənubi Koreya Xarici İşlər Nazirliyinə istinadla verdiyi məlumata görə, tərəflər kibertəhlükəsizlik əməkdaşlığını inkişaf etdirmək məqsədilə Seulda yüksək səviyyəli görüş keçiriblər.
Sentyabrın 11-də təşkil olunan görüşə Cənubi Koreyanın Beynəlxalq Kibermünasibətlər üzrə səfiri Li Tae U və NATO-nun İnnovasiya, Hibrid və Kiber məsələləri üzrə baş katib müavini Jan-Şarl Ellerman-Kinqombe sədrlik ediblər. Tərəflər kibertəhlükələrlə mübarizə sahəsində əməkdaşlığı artırmaq, həmçinin Hind–Sakit okean və Avropa–Atlantik bölgələrində kibertəhlükəsizlik risklərini birgə qiymətləndirmək barədə razılıq əldə ediblər.
Qeyd edək ki, Cənubi Koreya və NATO kibertəhlükəsizlik sahəsində əməkdaşlığı möhkəmləndirmək üçün yüksək səviyyəli kiber dialoqa 2023-cü ildən başlayıblar. Son inkişaflar isə Cənubi Koreya müdafiə naziri An Qyu-Bek ilə NATO Hərbi Komitəsinin sədri Cuzeppe Kavo Draqonenin Seul Müdafiə Dialoqu çərçivəsində görüşündən sonra baş verib.
Cənubi Koreya Müdafiə Nazirliyinin açıqlamasına görə, C.Kavo Draqone Cənubi Koreya ilə NATO arasında müdafiə və hərbi mübadilələr, məlumat paylaşımı, kiberməkan, kosmos və süni intellekt də daxil olmaqla müxtəlif sahələrdə konkret əməkdaşlığın dərinləşdirilib genişləndiriləcəyini bəyan edib.
