Pakistan təhlükəsizlik qüvvələrinin terrorla mübarizə əməliyyatları çərçivəsində Xeybər Paxtunxva əyalətində həyata keçirilən əməliyyatda 19 militant zərərsizləşdirilib, yeddi pakistanlı əsgər həyatını itirib. “Dawn” qəzetinin məlumatına görə, militantlara qarşı aparılan axtarış əməliyyatı zamanı təxminən yeddi təhlükəsizlik əməkdaşı həlak olub, 13 nəfər isə yaralanıb.

Rəsmi açıqlamada bildirilib ki, dağlıq ərazidə militantların təhlükəsizlik konvoyuna pusqu qurmasının ardından şiddətli silahlı toqquşma baş verib. İnsident zamanı bir pakistanlı əsgərin də itkin düşdüyü bildirilib. Yaralıların xəstəxanaya çatdırıldığı, bölgədə genişmiqyaslı polis qüvvələrinin yerləşdirildiyi qeyd olunub.

Pakistan prezidenti Asif Əli Zərdari və Baş nazir Şahbaz Şərif təhlükəsizlik qüvvələrini 19 militantın zərərsizləşdirildiyi uğurlu əməliyyata görə təbrik ediblər. Ölkə başçısı A.Zərdari bildirib ki, Pakistan terroru aradan qaldırmaqda qətiyyətlidir.

Baş nazir Şahbaz Şərif isə Xeybər Paxtunxvanın Mohmand, Şimali Vəziristan və Bannu rayonlarında keçirilən uğurlu əməliyyatları yüksək qiymətləndirərək bildirib ki, terrorla mübarizə ölkə tamamilə terrorçulardan təmizlənənə qədər davam edəcək.

Bildirilir ki, baş verən hadisələr Pakistan ordusunun sentyabrın 11-də açıqladığı və son iki gündə şimal-qərbdə ayrı-ayrı əməliyyatlarda 19 şübhəli militantın öldürüldüyü məlumatının ardınca baş verib.

Qeyd edək ki, Pakistanda son illərdə təhlükəsizlik qüvvələrinə qarşı hücumlar artmaqdadır. Bu hücumların məsuliyyətini isə adətən Əfqanıstan mərkəzli “Təhriki Taliban Pakistan” (TTP) qruplaşması öz üzərinə götürür. Rəsmi Kabil hökuməti isə bu ittihamları qəbul etmir.