Türkiyə Milli Müdafiə Nazirliyi iyulun 7-də yaydığı açıqlamada İraqın şimalında aparılan axtarış tədbirləri zamanı metan qazından zəhərlənən 12 hərbçinin şəhid olduğunu bildirib.
Hadisə bazar günü “Pəncə-Kilid” əməliyyatı bölgəsində yerləşən bir mağarada, 2022-ci ildə PKK terrorçuları tərəfindən şəhid edilmiş bir əsgərin cəsədinin axtarışı zamanı baş verib. Əməliyyat zamanı ümumilikdə 19 hərbçinin metan qazından zəhərləndiyi qeyd olunur.
Milli müdafiə naziri Yaşar Gülər yüksək rütbəli hərbi komandirlərlə birlikdə hadisə yerinə səfər edib və şəhid hərbçilərlə vida mərasimlərində iştirak edib.
Nazirliyin yaydığı bəyanatda deyilir: “Əziz şəhidlərimizə Allahdan rəhmət diləyir, ailələrinə, Türkiyə Silahlı Qüvvələrimizə və xalqımıza başsağlığı verir, səbr diləyirik.”
Qeyd edək ki, Türkiyə, ABŞ və Avropa İttifaqı tərəfindən terror təşkilatı kimi tanınan PKK 40 ildən artıqdır Türkiyəyə qarşı qanlı hücumlar həyata keçirir.
Bu təhdidlərə cavab olaraq Türkiyə 2022-ci ildə İraqın şimalındakı Metina, Zap və Avaşin-Basyan bölgələrində PKK-nın sığınacaqlarını hədəf alan “Pəncə-Kilid” əməliyyatına başlayıb.
PKK vaxtaşırı İraqın şimalını Türkiyəyə qarşı sərhədyanı hücumlar planlaşdırmaq və həyata keçirmək üçün baza kimi istifadə edir.
Türkiyə rəsmiləri Ankaranın bu fəaliyyətlərinin BMT Nizamnaməsinin 51-ci maddəsinə əsaslandığını və silahlı hücumlar zamanı özünümüdafiə hüququndan istifadə etdiyini dəfələrlə vurğulayıblar. Bundan əlavə, Türkiyə ilə İraq arasında mövcud olan ikitərəfli razılaşmalar da Türkiyəyə İraq ərazisində terrorla mübarizə əməliyyatları keçirməyə imkan verir.
