Birləşmiş Millətlər Təşkilatı (BMT) bildirib ki, İsrailin davam edən hücumları və atəşkəsin başa çatmasından sonra Qəzzada 700 mindən çox insan məcburi köçkün vəziyyətinə düşüb.
BMT-nin sözçüsü Stefan Dujarrik iyulun 7-də jurnalistlərə açıqlamasında deyib:
"Dünən, iki gün ərzində ikinci dəfə İsrail hakimiyyəti Xan Yunisin bəzi bölgələrinin təxliyə olunması barədə göstəriş verib. Həmin ərazilərdə təxminən 50 min insanın yaşadığı ehtimal edilir. Qəzzada artıq 700 mindən çox insan yurd-yuvalarını tərk etmək məcburiyyətində qalıb və onların əksəriyyəti bir neçə dəfə yer dəyişməyə məcbur olub".
S.Dujarrik bildirib ki, həftə sonu humanitar yardım almağa çalışan bəzi fələstinlilər öldürülüb.
“Biz mülki şəxslərin öldürülməsini bir daha qəti şəkildə pisləyirik”, – deyə o bildirib. Ümumdünya Ərzaq Proqramının hesabatına istinad edən sözçü qeyd edib ki, Qəzzada hər üç nəfərdən biri günlərlə qida qəbul etmir, bu isə bölgədə aclıq təhlükəsini daha da artırır.
BMT İsraili humanitar yardımın Qəzzaya maneəsiz çatması üçün bütün keçid məntəqələrini açmağa çağırdığını bir daha xatırladıb.
"İsrail hakimiyyəti artıq dörd aydır ki, Qəzzaya yanacağın daxil olmasına icazə vermir", – deyə S.Dujarrik vurğulayıb.
O, həmçinin xəbərdarlıq edib ki, bölgədəki yanacaq çatışmazlığı tezliklə internetin tamamilə kəsilməsinə səbəb ola bilər.
BMT-nin məlumatına görə, bazar günü üçün planlaşdırılan səkkiz humanitar koordinasiya missiyasından yalnız üçü İsrail hakimiyyəti tərəfindən təsdiqlənib ki, bu da yardım səylərini ciddi şəkildə məhdudlaşdırıb.
Qeyd edək ki, İsrail 2023-cü ilin oktyabrından etibarən Qəzzada genişmiqyaslı hücumlara başlayıb.
Hücumlar nəticəsində əksəriyyəti qadın və uşaq olmaqla 57.500-dən çox fələstinlinin həlak olduğu bildirilir. Fələstinin rəsmi WAFA xəbər agentliyinin məlumatına görə, təxminən 11.000 nəfərin dağıntılar altında qaldığı təxmin edilir. Ekspertlər bildirirlər ki, real itki sayı Qəzza rəsmilərinin açıqladığı rəqəmlərdən daha çox ola bilər.
Qeyd edək ki, ABŞ uzun illərdir İsrailin əsas müttəfiqlərindən biridir və hər il bu ölkəyə 3,8 milyard dollar hərbi yardım ayırır. 2023-cü ilin oktyabrından bəri ABŞ tərəfindən İsrailə ayrılan vəsaitin ümumi həcmi 22 milyard dolları keçib.
