Türkiyə Prezidenti Rəcəb Tayyib Ərdoğan PKK terrorçularının İraqın Süleymaniyyə şəhərində silahlarını təhvil verməsinə münasibət bildirib. O, bu hadisəni ölkə tarixində dönüş nöqtəsi adlandırıb.

“Bu gün yeni bir tarixi səhifə açıldı”, – deyən Ərdoğan bu addımı 47 ildir davam edən terror bəlasına son qoymaq yolunda “qətiyyətli bir addım” kimi qiymətləndirib.

Qeyd edək ki, iyulun 11-də 30 PKK üzvü İraqın şimalındakı mağaralardan birinin girişində silahlarını yandırıb. Bu hadisə PKK-nın Türkiyəyə qarşı illərdir davam edən terror fəaliyyətlərində atdığı ən simvolik addımlardan biri kimi qiymətləndirilib. PKK Türkiyə ilə yanaşı, ABŞ və Avropa İttifaqı tərəfindən də terror təşkilatı kimi tanınır.

Prezident Ərdoğan həmçinin deyib:“Türkiyə uzun, ağrılı və göz yaşları ilə dolu bir səhifəni bağlamağa başlayıb. Bu gün güclü Türkiyənin, 'Türkiyə Yüz İlinin' qapıları sonuna qədər açıldı”.

O, bu hadisəni həm milli dirçəlişin, həm də strateji qələbənin göstəricisi kimi qiymətləndirib. Prezident hökumətinin terrordan azad Türkiyə yaratmaq uğrunda apardığı mübarizəyə sadiq qalacağını vurğulayıb, birlik və hüquqi islahatlarla yola davam ediləcəyini qeyd edib.

Ərdoğan əldə olunan uğurun yalnız hökumətə deyil, bütün türk xalqına məxsus olduğunu qeyd edib:
“Türkiyə qazandı, millətim qazandı. Türk, kürd, ərəb – 86 milyon vətəndaşımızın hər biri qalib gəldi. Nə ediriksə, Türkiyə üçün edirik. Nə ediriksə, millətimiz üçün edirik. Nə ediriksə, müstəqilliyimiz və gələcəyimiz üçündür.”

Milli suverenlik məsələsində qətiyyətli mövqeyini bir daha ifadə edən Ərdoğan deyib:
“Hər kəs əmin olsun ki, Türkiyə Cümhuriyyətinin şərəfinin tapdalanmasına, baş əyməsinə heç vaxt imkan verməyəcəyik. Birliyimizi, bütövlüyümüzü, vətənimizi, millətimizi və sülhümüzü təhdid edən istənilən cəhdin qarşısını qətiyyətlə alacağıq”.