Një mjet për zbulimin e kancerit me inteligjencë artificiale nga gjiganti kinez i teknologjisë Alibaba ka marrë dritë jeshile nga Administrata e Ushqimit dhe Barnave (FDA) e ShBA-së, duke i hapur rrugën për shqyrtim dhe miratim të përshpejtuar.

South China Morning Post raportoi se Alibaba njoftoi se FDA-ja i ka dhënë përcaktimin “pajisje përparimtare” modelit Damo Panda të grupit të saj kërkimor.

Mjeti i inteligjencës artificiale, i krijuar për të zbuluar kancerin e pankreasit, për herë të parë u prezantua në vitin 2023 përmes një punimi të botuar në revistën Nature Medicine.

Sipas studimit, modeli është i aftë të zbulojë kancerin e pankreasit në fazën e hershme te pacientët asimptomatik, gjë që mund të jetë shumë e vlefshme pasi vendi i pankreasit thellë brenda trupit shpesh maskon praninë e kancerit.

Damo Panda është një model i të mësuarit të thellë i trajnuar në tomografinë kompjuterike të barkut (CT) nga 3.208 pacientë me kancer të pankreasit. Studiuesit nga Akademia Damo e kompanisë Alibaba raportuan se modeli tregoi ndjeshmëri prej 34.1 për qind më të lartë se radiologët në identifikimin e sëmundjes.

Modeli Damo Panda tashmë është vendosur në prova klinike në të gjithë Kinën. Në një spital në qytetin lindor Ningbo, mjeti ekzaminoi 40 mijë njerëz dhe identifikoi gjashtë raste të fazës së hershme të kancerit të pankreasit, duke përfshirë dy të humbura gjatë ekzaminimeve rutinë.

Sipas kompanisë Alibaba, Akademia Damo planifikon të zhvillojë më tej modelin e inteligjencës artificiale si në Kinë ashtu edhe në nivel ndërkombëtar, duke bashkëpunuar me kompanitë tilla si Ankon Medical Technologies.