Xoghayaha Guud ee Qaramada Midoobay, Antonio Guterres, ayaa ku baaqay in si degdeg ah loo joojiyo dagaallada isla markaana dib loogu laabto wadaxaajoodyo dhab ah oo ku saabsan barnaamijka nukliyeerka ee Iiraan, kadib markii Mareykanka uu ku biiray weerarada Israa’iil oo uu duqeeyey saddex goobood oo nukliyeer ah oo ku yaalla Iiraan.

"Hadda waxaan halis ugu jirnaa inaan galno silsilad aargoosi oo aan dhammaad lahayn," ayuu yiri Guterres isagoo ka hadlayay kulan degdeg ah oo Golaha Ammaanka ee Qaramada Midoobay uu yeeshay Axaddii.

"Waa inaan tallaabo qaadnaa – si degdeg ah oo go’aan leh – si loo joojiyo dagaalka loona soo celiyo wadaxaajoodyo waara oo dhab ah."

Xoghayaha Guud wuxuu ka digay in dadka Bariga Dhexe aysan awoodin inay xamilaan mawjad kale oo burbur ah, isagoo xusuusiyay Iiraan inay waajib ku tahay inay si buuxda ugu hoggaansanto Heshiiska Kahortagga Faafidda Hubka Nukliyeerka.

Madaxa IAEA: Fursadda wada-hadalka ayaa xirmeysa

Rafael Grossi, Agaasimaha Guud ee Hay’adda Caalamiga ah ee Tamarta Nukliyeerka (IAEA), ayaa ka digay in weeraradu ay sababeen "hoos u dhac weyn oo ku yimid badbaadada iyo amniga nukliyeerka," inkastoo aysan jirin wax mawjado shucaac ah.

Grossi wuxuu sheegay in xarunta Natanz ay soo gaartay "khasaare weyn," oo ay ku jiraan burbur ku yimid kaabayaasha korontada iyo hoolalka dhulka hoostiisa ku yaalla ee lagu kaydiyo walxaha uranium-ka.

Wuxuu ka digay suurtagalnimada dikhowga kiimikada wuxuuna sheegay in fursadda dib loogu laabanayo wadaxaajoodyada ay sii yaraanayso.

Safiirka Iiraan ee Qaramada Midoobay oo cambaareeyay Mareykanka

Safiirka Iiraan u fadhiya Qaramada Midoobay, Amir Saeid Iravani, ayaa ku tilmaamay duqeymaha Mareykanka inay yihiin dhiig daadis kale oo ku darsantay taariikhda siyaasadeed ee Washington, isagoo ku eedeeyay Ra’iisul Wasaaraha Israa’iil Benjamin Netanyahu inuu Mareykanka u soo jiiday "dagaal kale oo aan sal lahayn."

Isagoo ka hadlayay kulanka Golaha Ammaanka, Iravani wuxuu yiri, "Mar kale, dambiilaha dagaal ee caalamiga ah ee Netanyahu ayaa ku guuleystay inuu afduubo siyaasadda arrimaha dibadda ee Mareykanka."

Ruushka iyo Shiinaha oo cambaareeyay weerarada Mareykanka iyo Israa’iil

Safiirka Ruushka u fadhiya Qaramada Midoobay, Vassily Nebenzia, ayaa si adag u cambaareeyay duqeymaha, isagoo ku tilmaamay inay yihiin "ficillo aan mas’uuliyad lahayn, khatar ah oo ay sameeyeen Mareykanka kuwaasoo ka dhan ah dal xubin ka ah Qaramada Midoobay."

Wuxuu ka digay in Mareykanku uu furay albaab khatar aan dhamaan, isagoo intaas ku daray in "cidina aysan garan karin musiibooyinka cusub iyo dhibaatada ay keeni doonto."

Safiirka Shiinaha, Fu Cong, ayaa sidoo kale dhaleeceeyay, isagoo sheegay in ficillada Mareykanka ay "si weyn uga hor imaanayaan ujeeddooyinka iyo mabaadi’da Axdiga Qaramada Midoobay iyo sharciga caalamiga ah."

UK iyo Mareykanka oo difaacay weerarada

Safiirka Britain ee Qaramada Midoobay, Barbara Woodward, ayaa sheegtay in UK aysan ka qayb qaadan weerarada, balse ku adkeysatay in "Iiraan aysan yeelan karin hub nukliyeer ah," iyadoo barnaamijka Tehran ku tilmaantay "halis weyn oo ku wajahan nabadda iyo amniga caalamiga ah."

Ku-xigeenka Safiirka Mareykanka, Dorothy Shea, ayaa sheegtay in weerarada loogu talagalay in lagu burburiyo awoodda Iiraan ee kobcinta nukliyeerka.

"Waqtigu wuu yimid ugu dambeyntii in Mareykanku, isagoo difaacaya xulafadiisa iyo muwaadiniintiisa, uu tallaabo go’aan leh qaado," ayay tiri, iyadoo uga digtay Tehran inay ka aargudato.