Wata ‘yar ƙunar-baƙin-wake ta tayar da bam a Jihar Borno da ke arewa maso gabashin Nijeriya, inda ta kashe aƙalla mutum 10 tare da jikkata wasu da dama a cikin wata kasuwa, in ji 'yan sanda a ranar Asabar.
Wannan fashewar ta faru ne a Konduga a ranar Juma’a da dare, kamar yadda kakakin ‘yan sanda, Nahum Daso, ya shaida wa Kamfanin Dillancin Labarai na AP.
Konduga na da nisan kimanin kilomita 40 (mil 25) daga Maiduguri, babban birnin Jihar Borno da ke arewa maso gabas.
Babu wata ƙungiya da ta ɗauki alhakin kai wannan harin, amma yankin arewa maso gabashin Nijeriya ya sha fama da hare-haren da mayakan ƙungiyar Boko Haram da kuma ɓangarenta na Islamic State West Africa Province (ISWAP), suke kaiwa.
Ƙungiyar Boko Haram ta fara ɗaukar makamai tun a shekarar 2009, rikicin da ya bazu har zuwa maƙwabtan arewacin Nijeriya.
Majalisar Ɗinkin Duniya ta bayyana cewa, kimanin fararen hula 35,000 ne suka rasa rayukansu, yayin da fiye da mutum miliyan biyu suka rasa matsugunansu a wannan yanki na arewa maso gabas.
Duk da alƙawuran da gwamnatin Shugaba Bola Tinubu ta yi na magance matsalolin tsaro a Nijeriya, tashe-tashen hankulan sun ci gaba da wanzuwa a ƙasar.
