Kamar yadda ake gani a sassa daban-daban na Afirka, gidajen tarihi a Masar suna da ra'ayin cewa ba kawai masu kula da tarihi ba ne, amma kuma wurare ne masu ayyuka daban-daban da ke tsara abubuwa da dama na ci gaba ga al’ummominsu.

Wannan sauyi ya fito fili kwanan nan a Ranar Gidajen Tarihi ta Duniya, a ranar 18 ga Mayu. Hukumar Gidajen Tarihi ta Duniya (ICOM) ta bayyana wannan rana a matsayin "damar ban mamaki don haɗa dukkan mambobi cikin wata waƙa da ake rerawa ta hanyoyi daban-daban."

Ma’aikatar Yawon Bude Ido da Kayan Tarihi ta Masar ta yi bikin wannan rana ta hanyar bayar da damar shiga kyauta ga gidajen tarihi da dama, tana gayyatar 'yan ƙasa su su tsunduma domin ganin arzikin tarihi na ƙasar.

Wannan taron na shekara-shekara ya dace da dawowar kayan tarihin Masar da aka sace daga Australiya yayin da kasashen Afirka ke ci gaba da fafutukar dawo da dukiyoyin al'adu da fasaha da aka sace a lokacin mulkin mallaka.

‘‘Masar ta dawo da kayan tarihi guda 21 na tsohuwar Masar daga Australiya tare da haɗin gwiwar Ma’aikatar Harkokin Waje da Shige da Fice da 'Yan Kasar Waje na Masar.

Wadannan abubuwa sun haɗa da gumakan ushabti, wani ɓangaren akwatin gawa, kan maciji na katako da kuma wani yadi na Coptic,’’ in ji ma’aikatar a wata sanarwa.

A makon da ya gabata, kasar da ke arewacin Afirka ta dawo da kayan tarihi guda 25 masu daraja da aka fitar da su zuwa Amurka.

Kayayyakin sun haɗa da wani akwatin katako wanda ya shafe shekara 5,500, da wasu sassa na ɗakin bauta wanda ake kyautata zaton na Sarauniya Hatshepsut ne da kuma daskararriyar gawa ta zamanin Girka da Roma daga Fayyoum – wanda birni ne da ya shahara kan kayayyakinsa na zane.

Wannan taron ya kuma haɗa da kayan ado masu kyau da aka ƙera shekaru kusan 2,400 da suka gabata, wani ɓangaren ƙafar dutse na granite daga zamanin mulkin Ramessid, lokacin da Masar ta kasance a kololuwar ƙarfinta, da kuma ƙananan siffofi na hauren giwa da dutse.

Dawowar da kayan tarihin na baya-bayan nan sun zo ne yayin da Masar, daya daga cikin tsoffin al'ummomin duniya, ke ƙoƙarin jawo hankalin masu yawon bude ido na cikin gida da na duniya zuwa gidajen tarihinta masu cike da tarihi, kamar yadda Ma’aikatar Yawon Bude Ido da Kayan Tarihi ta bayyana a wannan shekarar a Ranar Gidajen Tarihi ta Duniya.

Taron duniya

Jigon duniya na wannan rana a shekarar 2025, "Makomar Gidajen Tarihi a Cikin Al'ummomi Masu Sauyi Mai Sauri" ya jaddada yadda gidajen tarihi za su iya tafiya tare da bayar da gudummawa ga duniya da ke fuskantar manyan sauye-sauyen zamantakewa, fasaha, da muhalli,” in ji Hukumar Gidajen Tarihi ta Duniya a wata sanarwa.

Shugabar hukumar, Emma Nardi, ta lura cewa jigon ya yi daidai da burin duniya na inganta ilimi mai kyau da ƙarfafa kirkire-kirkire da gine-gine.

Wannan rana ta kasance ana bikin ta a duniya baki ɗaya, inda kasashen Afirka da dama suka shirya abubuwan daban-daban.

A Lagos, Najeriya, gidajen tarihi sun rayu da murnar rawa mai kayatarwa. Masu rawa da suka yi ado da kayan tarihi sun sauya wuraren zuwa shaidu masu rai na al'ada, suna nuna yadda al'adu ke da motsi da kuma rayuwa mai cike da kuzari.

Kungiyoyi irin su Cibiyar Bincike a Al'adu da Fasaha (CeRCCA) da Kungiyar Malaman Fasaha ta Ghana (ATAG) sun yaba wa kowane mai kula, malami, da mai adana tarihi, suna gane muhimmiyar rawar da suke takawa wajen tsara wannan sabon labarin.