Populli palestinez ka nevojë për “veprimin tonë të përbashkët”, tha të hënën ministri turk i Jashtëm, Hakan Fidan, në hapjen e një takimi urgjent të Organizatës për Bashkëpunim Islamik (OBI) mbi Gazën.

Duke folur në takimin e Këshillit të Ministrave të Jashtëm të OBI-së, i mbajtur në Xhide, Fidan tha: “Ajo që populli palestinez ka nevojë është veprimi ynë i përbashkët”.

Ai gjithashtu nënvizoi rëndësinë e “presionit të koordinuar” për të detyruar Izraelin drejt një zgjidhjeje të qëndrueshme.

Takimi i OBI-së, i kryesuar nga diplomati i lartë turk, do të fokusohet te veprimet aktuale izraelite në Gaza dhe synon t'i koordinojë pozicionet dhe reagimet e shteteve anëtare.

Që nga tetori 2023, Izraeli ka vrarë gati 62.700 palestinezë në një sulm të egër mbi Gazën. Fushata ushtarake ka shkatërruar enklavën, e cila po përballet me uri akute.